Manwat Dowry Harassment Case
मानवत : हुंड्यासाठी छळ करून महिलेला मारहाण व जीवे मारण्याची धमकी दिल्याची घटना मानवत शहरात उघडकीस आली आहे. या प्रकरणी चार जणांविरुद्ध मानवत पोलीस ठाण्यात गुन्हा दाखल करण्यात आला आहे.
पोलीस सूत्रांकडून मिळालेल्या माहितीनुसार, फिर्यादी महिला ही आंबेगावगाव नाका परिसरात राहणारी असून, तिचा पती शाहरुख खान जमानत खान पठाण, सासू बीबी जमानत खान पठाण, सासरे जमानत खान पठाण तसेच नणंद निलाफेर आलीम शेख इनामदार यांनी संगनमताने तिचा छळ केल्याची तक्रार दाखल करण्यात आली आहे.
दि. ३ मे रोजी रात्री सुमारे १० वाजण्याच्या सुमारास आरोपींनी “माहेरून २ लाख रुपये आण” या कारणावरून महिलेशी वाद घालत शिवीगाळ केली. त्यानंतर पतीने स्वयंपाकघरातील चाकूने तिच्या उजव्या गालावर वार करून जखमी केले. तर इतर आरोपींनीही मारहाण करत तिला घराबाहेर काढण्याची धमकी दिल्याचे तक्रारीत नमूद आहे.
या घटनेप्रकरणी मानवत पोलीस ठाण्यात गुन्हा नोंदविण्यात आला असून पुढील तपास पोलीस निरीक्षक संदीप बोरकर यांच्या मार्गदर्शनाखाली सुरू आहे. या घटनेमुळे परिसरात खळबळ उडाली असून महिलांवरील अत्याचाराच्या घटनांबाबत संताप व्यक्त केला जात आहे.
