Jintur Illegal Cattle Slaughter
बोरी : जिंतूर तालुक्यातील कौसडी येथे पोलिसांनी शनिवारी (दि. ३०) केलेल्या धाडीत कथित गोवंश कत्तलीचा प्रकार उघडकीस आला. या कारवाईदरम्यान घटनास्थळावरून १२ गोवंशांची मुंडकी, एका मृत बैलाचा धड तसेच कत्तलीसाठी वापरली जाणारी धारदार हत्यारे जप्त करण्यात आली. या घटनेमुळे परिसरात खळबळ उडाली असून मुख्य संशयित फरार झाला आहे.
पोलिसांनी दिलेल्या माहितीनुसार, कौसडी गावातील एका ठिकाणी गोवंशांची अवैधरित्या कत्तल केली जात असल्याची गुप्त माहिती प्राप्त झाली होती. माहितीची पडताळणी केल्यानंतर बोरी पोलीस ठाण्याचे सहाय्यक पोलीस निरीक्षक रामेश्वर धोंडगे यांच्या मार्गदर्शनाखाली बीट जमादार राजेश जटाळ यांनी सहकाऱ्यांसह संबंधित ठिकाणी छापा टाकला.
पोलिसांचे पथक घटनास्थळी पोहोचताच संशयित तेथून पसार झाल्याचे सांगण्यात आले. त्यानंतर करण्यात आलेल्या तपासणीत १२ गोवंशांची मुंडकी, एका मृत बैलाचा धड आणि धारदार हत्यारे आढळून आली. पोलिसांनी पंचनामा करून सर्व साहित्य जप्त केले.
या कारवाईत पोलीस कर्मचारी प्रकाश मोरे आणि संघसेन कांबळे यांनीही सहभाग घेतला. घटनेची माहिती परिसरात पसरल्यानंतर नागरिकांनी घटनास्थळी गर्दी केली. कौसडी व बोरी परिसरातील ग्रामस्थांमध्ये संताप व्यक्त करण्यात येत असून, या प्रकरणातील दोषींवर कठोर कारवाई करण्याची मागणी होत आहे. विविध सामाजिक व धार्मिक संघटनांनीही या घटनेचा निषेध नोंदविला आहे.
दरम्यान, घटनेची माहिती मिळताच बोरी येथील रामेश्वर चौधरी, विलास चौधरी, मुन्ना देशमुख यांच्यासह काही युवकांनी घटनास्थळी धाव घेतली. पोलिसांनी कायदा व सुव्यवस्था अबाधित राखण्यासाठी परिसरात विशेष बंदोबस्त ठेवला आहे.
या प्रकरणी संबंधित कायद्यांनुसार गुन्हा दाखल करण्याची प्रक्रिया सुरू असून फरार संशयिताचा शोध घेण्यासाठी विशेष पथके कार्यरत आहेत. तसेच या प्रकारात इतर कोणाचा सहभाग आहे का, संबंधित जनावरे कोठून आणण्यात आली होती आणि हा प्रकार किती काळापासून सुरू होता, याचाही पोलिसांकडून तपास केला जात आहे.
कौसडी येथील या घटनेमुळे जिंतूर तालुक्यात मोठी चर्चा सुरू असून पोलिस तपासातून पुढे आणखी माहिती समोर येण्याची शक्यता व्यक्त केली जात आहे.
