Nanded Purna Road Bike Auto Collision
पूर्णा : पूर्णा तालुक्यातील नांदेड–पूर्णा महामार्गावरील गौर गावाजवळ शुक्रवारी (दि. ३) दुपारी सुमारे १ वाजण्याच्या सुमारास भरधाव दुचाकीने प्रवासी ऑटोला पाठीमागून जोरदार धडक दिल्याने झालेल्या अपघातात चौघेजण जखमी झाले.
मिळालेल्या माहितीनुसार, एमएच २२ एपी ४०८८ क्रमांकाचा प्रवासी ऑटो गौर येथून प्रवासी घेऊन पूर्णाकडे जात होता. याचवेळी पाठीमागून भरधाव वेगाने येणाऱ्या एमएच २२ बीजे ९७३२ क्रमांकाच्या पल्सर दुचाकीने ऑटोला जोरदार धडक दिली. धडकेचा जोर इतका होता की, ऑटोचा ताबा सुटून तो रस्त्याच्या मध्यभागी उलटला.
या अपघातात ऑटोमधील एक महिला व एक पुरुष गंभीर जखमी झाले, तर अन्य दोघांना हात व नाकाला दुखापत झाली. अपघाताची माहिती मिळताच चुडावा पोलीस ठाण्याचे पोलीस उपनिरीक्षक चव्हाण व पोलीस कॉन्स्टेबल महाजन यांनी घटनास्थळी धाव घेत पाहणी केली.
जखमींना तातडीने पूर्णा येथील खासगी रुग्णालयात प्राथमिक उपचार देऊन पुढील उपचारासाठी नांदेड येथे हलविण्यात आले. दरम्यान, अपघातातील दुचाकीस्वारावर पूर्णा ग्रामीण रुग्णालयात उपचार सुरू आहेत.
या प्रकरणी चुडावा पोलीस ठाण्यात गुन्हा दाखल करण्याची प्रक्रिया सुरू असून, जखमी सर्वजण गौर येथील रहिवासी असल्याची प्राथमिक माहिती मिळाली आहे.
