Charthana Illegal Sand Transport
चारठाणा : विना परवाना अवैधरीत्या रेतीची वाहतूक करणाऱ्या ट्रॅक्टरवर चारठाणा पोलिसांनी कारवाई केली. देवगाव परिसरात केलेल्या या कारवाईत ट्रॅक्टर, ट्रॉली आणि रेती असा एकूण ६ लाख १० हजार ५०० रुपयांचा मुद्देमाल जप्त करण्यात आला. याप्रकरणी दोघांविरुद्ध गुन्हा दाखल करण्यात आला आहे.
चारठाणा पोलिसांना देवगाव परिसरातून अवैध पद्धतीने रेतीची वाहतूक होत असल्याची माहिती मिळाली होती. या माहितीच्या आधारे सहाय्यक पोलीस निरीक्षक बालाजी पुंड यांच्या मार्गदर्शनाखाली पोलिसांनी देवगावजवळ सापळा रचला. यावेळी एमएच २२ डब्ल्यू १८९७ क्रमांकाचा ट्रॅक्टर पोलिसांच्या निदर्शनास आला. ट्रॅक्टरला लाल रंगाची विना पासिंगची ट्रॉली जोडलेली होती. या ट्रॉलीमध्ये सुमारे दीड ब्रास रेती आढळून आली. या रेतीची किंमत १० हजार ५०० रुपये असल्याचे पोलिसांनी सांगितले.
पोलिसांनी ट्रॅक्टर हेड, ट्रॉली आणि रेती असा एकूण ६ लाख १० हजार ५०० रुपयांचा मुद्देमाल जप्त केला. या प्रकरणी पोलीस शिपाई दत्ता कुंडलिकराव चव्हाण यांच्या फिर्यादीवरून शंकर भगवान केरळकर (वय २१, रा. निरवाडी, ता. सेलू) आणि एकनाथ मधुकर गरड (रा. देवगाव फाटा, ता. सेलू) यांच्याविरुद्ध गुन्हा दाखल करण्यात आला आहे.
या प्रकरणाचा पुढील तपास सहाय्यक पोलीस निरीक्षक बालाजी पुंड यांच्या मार्गदर्शनाखाली पोलीस हवालदार थोरे करीत आहेत.
