Young woman kidnapped; Police arrest both accused
नांदेड, पुढारी वृतसेवा : भर रस्त्यातून एका १९ वर्षीय मुलीचे अपहरण करणाऱ्या दोघांविरुद्ध वजिराबाद पोलिसांनी गुन्हा दाखल केला आहे. बुधवारी सायंकाळी घडलेल्या या घटनेनंतर पोलीस प्रशासनाने तातडीने उपाययोजना करत मुलीची सुखरूप सुटका केली, शिवाय दोन्ही आरोपींना जेरबंद केले. आरोपींपैकी एक जण अल्पवयीन बालक असल्याचे सांगण्यात आले.
नांदेडमधील पक्कीचाळ येथील रहिवासी अस-लेली एक १९ वर्षीय तरुणी रेल्वेस्थानक परिसरात भीक मागून आपला उदरनिर्वाह चालवते. इतवारा परिसरातील मोहम्मद खाजा इरफान म. इरफान (वय २१) हीची त्याच्याशी ओळख होती. ते दोघे नेहमी एकमेकांशी बोलायचे; पण गेल्या काही दिवसांपासून या दोघांमध्ये वाद सुरु होता.
बुधवारी सायंकाळी मोहम्मद खाजा म. इरफान याने आपल्या एका सहकाऱ्यासोबत त्या मुलीच्या अपहरणाचा डाव रचला. रात्री ७.३० वाजता रेल्वेस्थानक परिसरातून या दोघांनी त्या तरुणीला उचलून गाडीवर बसवत घेऊन गेले. अपहरणासारखा हा प्रकार लक्षात आल्यानंतर तसेच याचा ध्वनीचित्रफित समाजमाध्यमांवर प्रसृत झाल्यानंतर पोलीस यंत्रणा खडबडून जागी झाली.
पोलीस अधीक्षक अबिनाशकुमार, अतिरिक्त पोलीस अधीक्षक सूरज गुरव यांच्यासह वरिष्ठ पोलीस अधिकारी घटनास्थळी धावले. आवश्यक त्या सूचना करून पोलिसांनी तात्काळ नाकाबंदी केली व अवघ्या दोन तासांत त्या मुलीची सुखरूप सुटका केली. संबंधित मुलगी जवाहर नगर येथे सापडली.
या संपूर्ण प्रकरणात पोलिसांनी तांत्रिक कौशल्य वापरले. स्वतः सर्व वरिष्ठ अधिकारी संपूर्ण परिस्थितीवर नियंत्रण ठेऊन होते. मुख्य आरोपी हा मिस्त्री काम करतो, असे तपासात निष्पन्न झाले आहे. गुरुवार (दि.३१) त्या मुलीने दिलेल्या तक्रारीवरून वजिराबाद पोलिसांनी अपहरणाचा गुन्हा दाखल केला असून मुख्य आरोपी मोहम्मद खाजा म. इरफान याची रेल्वेस्थानक परिसरात पोलिसांनी धिंड काढली. दुसरा आरोपी हा अल्पवयीन असल्याने त्याच्यावर नियमानुसार कार्यवाही करण्याची प्रक्रिया सुरु होती.
