Women harrasment by a fake maharaj
नांदेड, पुढारी वृत्तसेवा :
ज्या हातांनी आशीर्वाद द्यायचे, त्याच हातांनी एका महिलेचे आयुष्य उद्ध्वस्त करण्याचा संतापजनक प्रकार नांदेडमध्ये उघडकीस आला आहे. गुरु-शिष्य या पवित्र नात्याला काळिमा फासत, लग्नाचे आमिष दाखवून एका भोंदू महाराजाने ४७वर्षीय महिलेवर अत्याचार केला. याप्रकरणी भाग्यनगर पोलिसांनी नराधम हरीगीर दत्तगीर गिरी (३८) याला अटक केली आहे. नाशिकच्या कॅप्टन खरात प्रकरणानंतर आता नांदेडमधील या घटनेने महाराष्ट्र पुन्हा एकदा हादरला आहे.
श्रद्धेच्या नावाखाली वासनेचा सापळा
गाडीपुरा भागातील महंत बाळगीर महाराज मठ हा भाविकांच्या श्रद्धेचा केंद्रबिंदू. याच मठाचा प्रमुख अस-लेला हरीगीर महाराज याच्या संपर्कात पीडित महिला मे २०२५ मध्ये आली होती. मोबाईल नंबरची देवाणघेवाण झाल्यानंतर महाराजांने महिलेचा विश्वास संपादन केला. जून महिन्यात महिलेने त्याला गुरु मानले, मात्र याच श्रद्धेचा फायदा घेत नराधमाने वासनेचा सापळा रचला.
नराधम पोलिसांच्या कोठडीत
अखेर पीडित महिलेने हिंमत एकवटून भाग्यनगर पोलीस ठाणे गाठले. पोलिसांनी घटनेचे गांभीर्य ओळखून आरोपी हरीगीर दत्तगीर गिरी याच्यावर कलम ६९ आणि ३५१ (२) अंतर्गत गुन्हा दाखल करून त्याला बेड्या ठोकल्या आहेत. धर्माच्या नावाखाली चालणाऱ्या अशा भोंदूगिरीमुळे समाजात तीव्र संताप व्यक्त होत आहे.
वाढदिवसाचे निमंत्रण अन् काळरात्र
स्वतःच्या वाढदिवसाचे निमित्त साधून महाराजांने पीडितेशी जवळीक साधली. लग्नाचे खोटे आमिष दाखवून तिच्या असहायतेचा फायदा घेत अत्याचार केला. जेव्हा पीडितेने लग्नासाठी तगादा लावला, तेव्हा "मी संन्यासी आहे, लग्न करू शकत नाही; पैसे घे आणि प्रकरण मिटव, " अशी धमकी देऊन त्याने पीडितेच्या भावनांची क्रूर थट्टा केली.
