NCP BJP independent contest Pusad election
उमरखेड : कधी काळी एकसंघ असलेला पुसद येथील नाईक परिवार आता दुभंगला आहे. एकाच परिवारातील सदस्य वेगवेगळ्या राजकीय पक्षात आहेत. माजी मंत्री मनोहरराव नाईक त्यांचे कनिष्ठ चिरंजीव राज्यमंत्री इंद्रनील नाईक राष्ट्रवादी काँग्रेसमध्ये आहेत. तर थोरले पुत्र ययाती नाईक व पुतणे माजी आमदार अॅड. नीलय नाईक भाजपमध्ये आहेत.
पुसद नगर पालिकेची निवडणूक राष्ट्रवादी काँग्रेस स्वबळावर लढवत असून भाजपने आपली वेगळी चूल मांडली आहे. इंद्रनील नाईक यांच्या पत्नी मोहिनी नाईक या राष्ट्रवादी काँग्रेसतर्फे अध्यक्षपदाची निवडणूक लढवत आहेत आणि घरोघरी जाऊन प्रचार करीत आहेत. इकडे भाजपतर्फे निखिल चिद्दरवार अध्यक्षपदाच्या मैदानात आहेत. त्यांच्या विजयासाठी नाईक घराण्यातील दोन्ही जाऊबाई डॉ. सुजाता नीलय नाईक व उद्गम फाऊंडेशन पुसदच्या सचिव सोनल ययाती नाईक घरोघरी जाऊन प्रचार करीत आहेत.
आता मोहिनी नाईक यांची निवडणूक निशाणी 'घड्याळ' आहे. तर त्यांच्या या जाऊबाई मात्र कमळाचा प्रचार करताना दिसत आहेत. नाईक परिवारातील असे चित्र आजपर्यंत दिसले नाही. आता मोहिनी नाईक विजयी होतात की, त्यांच्या जावा विजयोत्सव साजरा करतात. याकडे ३ डिसेंबररोजी जाहीर होणाऱ्या निकालाकडे सर्वांचे लक्ष लागून राहिले आहे.
