मुदखेड (नांदेड) : मुदखेड नगरपरिषद निवडणूक जाहीर झालेली असून भारतीय जनता पक्षासोबत युती करण्यास एक पाऊल पुढे आहोत. युती झाली तर ठीक, अन्यथा शिवसेना शिंदे गट स्वबळावर निवडणूक लढवून मुदखेड नगरपरिषद व भगवा फडकविणार असल्याचा विश्वास आमदार बाबुराव कदम कोहळीकर यांनी पक्ष कार्यालयाच्या उद्घाटनप्रसंगी केले.
2 डिसेंबर रोजी मुदखेड नगर परिषदेची सार्वत्रिक निवडणूक होणार आहे. सर्वच पक्षांनी आपापल्या परीने मतदारांची जुळवा जुळव सुरू केलेली आहे. शिवसेना शिंदे गट महायुतीत घटक पक्ष आहे. यासाठी होणाऱ्या नगर परिषदेच्या निवडणुकीत आम्ही भारतीय जनता पक्ष सोबत युती करण्यास एक पाऊल पुढे येत तयारीत आहोत, पण भाजपकडून युती संदर्भात निर्णय न घेतल्यास शिवसेना शिंदे गट मुदखेड नगर परिषदेचे २० वार्ड व एक नगराध्यक्षपदासाठी उमेदवार उभे करणार असून नगरपरिषदेवर भगवा फडकवल्याशिवाय राहणार नाही अशी ग्वाही दिली.
यावेळी हदगाव हिमायतनगरचे आमदार बाबुराव कदम कोहळीकर यांनी उपमुख्यमंत्री एकनाथ शिंदे यांच्या मार्गदर्शनाखाली राज्यभरातील शासनाचे काम कशाप्रकारे सुरू आहे, याचीही माहिती उपस्थित कार्यकर्त्यांना दिली. जिल्हा प्रमुख विनय गिरडे पाटील यांनीही कार्यकर्त्यांना मार्गदर्शन केले. महिला जिल्हाध्यक्षा गीताताई पुरोहित, येथील शिवसेना शिंदे गटाचे शहर प्रमुख सचिन माने, संजय पाटील कुरे, बाजार समिती माजी संचालक सुरेश शेटे आदींनी मुदखेड शहरातील आजची राजकीय परिस्थितीची माहिती सांगितली. शिवसेना पक्षाच्या कार्यालयाचे उद्घाटन सर्वप्रथम झाल्याने सध्यातरी शिवसेना शिंदे गट सर्वच राजकीय पक्षांच्या पुढे दिसत आहे. उद्घाटनप्रसंगी शहर व ग्रामीण भागातील अनेक तरुणांनी शिवसेनेत प्रवेश घेऊन हाती भगवा घेतला.
