Nanded News : Police raid gambling dens in Nanded; Action against 8 persons
नांदेड, पुढारी वृत्तसेवा: नांदेड शहर आणि परिसरात बेकायदेशीर जुगार आणि मटका अड्ड्यांविरुद्ध पोलिसांनी धडक मोहीम हाती घेतली आहे. भाग्यनगर आणि इतवारा पोलीस ठाण्याच्या हद्दीत केलेल्या तीन वेगवेगळ्या कारवायांमध्ये पोलिसांनी लाखोंच्या मुद्देमालासह जुगाराचे साहित्य जप्त केले असून, अनेक आरोपींवर गुन्हे दाखल केले आहेत.
पहिली कारवाई भाग्यनगर पोलीस ठाण्याच्या हद्दीत करण्यात आली. ३ जुलै रोजी रात्री १०.३५ वाजण्याच्या सुमारास राजकॉर्नर येथील एका शटरमध्ये बेकायदेशीरपणे 'मिलन डे' नावाचा जुगार खेळला जात असल्याची माहिती पोलिसांना मिळाली. त्यानुसार पोलिसांनी तेथे छापा टाकला.
या कारवाईत आरोपी नितुल विनोद चव्हाण (वय ३९, रा. निळा रोड, नांदेड) याच्यासह इतर सात जणांना ताब्यात घेण्यात आले. पोलिसांना घटनास्थळी रोकड, दोन मोबाईल आणि तीन स्कुटी असा एकूण २,१३,८६० रुपयांचा मुद्देमाल आणि जुगाराचे साहित्य मिळून आले. याप्रकरणी पोलीस उपनिरीक्षक संकेत केशवराव सवराते यांच्या फिर्यादीवरून भाग्यनगर पोलीस ठाण्यात गुन्हा दाखल करण्यात आला.
दुसरी कारवाई इतवारा पोलीस ठाण्याच्या हद्दीत करण्यात आली. गंजेवार यांच्या घरासमोरील सार्वजनिक रस्त्यावर बेकायदेशीरपणे 'नाईट मिलन' नावाचा मटका जुगार सुरू होता. पोलिसांनी गोपाळ नंदकुमार गजेवार (वय २६, रा. इतवारा) आणि भगवान मारोती कुरूडे (रा. महेबुब नगर, नांदेड) यांना मटका खेळताना व खेळवताना रंगेहात पकडले. त्यांच्याकडून ११,२६० रुपयांची नगदी रोकड आणि जुगाराचे साहित्य जप्त करण्यात आले. पोलीस कॉन्स्टेबल इसराईल युसुफ शेख यांच्या फिर्यादीवरून गुन्हा दाखल झाला.
तिसऱ्या कारवाईत इतवारा भागातीलच मंडई येथे ४ जुलै रोजी दुपारी ४.४५ वाजण्याच्या सुमारास तिसरी कारवाई करण्यात आली. येथे शोएब खान हुसैन खान (वय ३०, रा. मंडई, इतवारा) हा विनापरवाना 'मिलन डे क्लोज' नावाचा मटका जुगार चालवत असताना पोलिसांच्या जाळ्यात अडकला. त्याच्याकडून ३,२०० रुपयांची रोकड आणि मटक्याचे साहित्य जप्त करण्यात आले. उपविभागीय पोलीस अधिकारी कार्यालयाचे सहायक पोलीस उपनिरीक्षक विक्रम बालाजी वाकडे यांनी दिलेल्या फिर्यादीवरून इतवारा पोलीस ठाण्यात गुन्हा नोंदवण्यात आला.
