Chikhali Phata Sonal Road Accident
किनवट : रक्षाबंधनाचा कार्यक्रम आटोपून प्रवास सुरू असताना चिखली फाटा-सोनाळा मार्गावरील दहेगावजवळ ऑटो रिक्षा आणि दुचाकीची शनिवारी (दि. २९) दुपारी दोनच्या सुमारास जोरदार धडक झाली. या अपघातात ऑटो रिक्षातील ६० वर्षीय महिलेचा घटनास्थळीच मृत्यू झाला, तर अन्य तीन जण गंभीर जखमी झाले. जखमींना गोकुंदा उपजिल्हा रुग्णालयात प्राथमिक उपचारानंतर पुढील उपचारासाठी आदिलाबाद येथे हलविण्यात आले.
मृत महिलेची ओळख नरपतीबाई बद्दूसिंग कत्त्तेलवार (वय ६०, रा. यमाईकुंटा, इंद्रावेल्ली, जि.आदिलाबाद.तेलंगणा) अशी झाली आहे. मिळालेल्या प्राथमिक माहितीनुसार, सोनाळाकडून चिखलीच्या दिशेने येणाऱ्या दुचाकीची दहेगावजवळ किनवटकडून येणाऱ्या ऑटो रिक्षासोबत धडक झाली. धडक जोरदार असल्याने ऑटोमधील नरपतबाई कटकवाल यांचा जागीच मृत्यू झाला.
अपघातात जखमी झालेल्या तिघांना तातडीने गोकुंदा उपजिल्हा रुग्णालयात दाखल करण्यात आले. त्यांची प्रकृती गंभीर असल्याने प्राथमिक उपचारानंतर त्यांना पुढील उपचारासाठी आदिलाबाद येथील रुग्णालयात हलविण्यात आल्याची माहिती आहे.
अपघाताची माहिती मिळताच पो.नि.गणेश कराड यांच्या आदेशानुसार पोलीस हवालदार सिद्धार्थ वाघमारे यांनी घटनास्थळी धाव घेतली. पोलिसांनी घटनास्थळाचा पंचनामा करून पुढील तपास सुरू केला आहे. दोन्ही वाहनांची धडक नेमकी कोणत्या कारणामुळे झाली, याचे कारण अद्याप स्पष्ट झालेले नसून, पोलिस तपासानंतर अपघाताचे नेमके कारण समोर येणार आहे.
