उमरी : येथे ट्रॅक्टर आणि कारची समोरासमोर धडक होऊन व्हीपीके उद्योग समूहातील एमव्हीके कारखान्याचे शेतकी अधिकारी प्रकाश मारोतराव पवार (वय 56 वर्ष रा. हंगिरगा ता. उमरी) यांचा मृत्यू झाला. हा अपघात गुरुवारी (दि.5 फेब्रुवारी) रात्री आठ वाजण्याच्या सुमारास उमरी तालुक्यातील गोळेगाव ते निमटेक रस्त्यावर घडला आहे.
व्हीपीके उद्योग समूहातील साखर कारखान्यातील शेतकी अधिकारी प्रकाश पवार हे वाघलवाडा कारखान्यावरील आपली ड्युटी संपवून कारने उमरीकडे येत होते. दरम्यान समोरून येणाऱ्या एका ट्रॅक्टरने त्यांच्या कारला जोराची धडक दिली. या धडकेत प्रकाश पवार हे गंभीररीत्या जखमी झाले. त्यांना तात्काळ उमरीच्या ग्रामीण रुग्णालयात दाखल करण्यात आले. डॉ. नितीन कुऱ्हे यांनी तपासून त्यांना मृत घोषित केले. घटनास्थळावर पोलीस आणि परिसरातील असंख्य शेतकरी, नागरिकांनी धाव घेतली. हा अपघात भयानक होता. मोठा आवाज झाला असे प्रत्यक्षदर्शीने सांगितले.
मुलाचाही अपघातातच मृत्यू झाला होता...
काही वर्षापूर्वी शेतकी अधिकारी प्रकाश पवार यांच्या इंजीनियरिंगचे शिक्षण घेणाऱ्या मुलाचाही रस्ता अपघातातच मृत्यू झाला होता. त्यानंतर त्यांचाही अपघातात मृत्यू झाल्याने परिसरात हळहळ व्यक्त केली जात आहे. दरम्यान अपघातानंतर ट्रॅक्टर चालक हा फरार झाला. पुढील कारवाई उमरी पोलीस करीत आहेत. शेतकी अधिकारी प्रकाश पवार यांच्या पार्थिवावर शुक्रवारी दुपारी उमरी तालुक्यातील हंगिरगा या त्यांच्या गावी अंत्यसंस्कार करण्यात येणार असल्याची माहिती देण्यात आली आहे.
