Dharmabad Municipal Council appeals to citizens to save water!
धर्माबाद : पुढारी वृत्तसेवा धर्माबाद शहरातील नागरिकांनी पिण्याच्या पाण्याचा वापर काटकसरीने करावा, उपलब्ध पाण्याचा अपव्यय टाळावा आणि पाणी बचतीला प्राधान्य द्यावे, असे आवाहन धर्माबाद नगरपरिषदेच्या वतीने नागरिकांना करण्यात आले आहे. संभाव्य पाणीटंचाईची परिस्थिती लक्षात घेता नगरपरिषद प्रशासनाने पाणी बचतीसाठी नागरिकांनी पुढाकार घेण्याचे आवाहन केले आहे.
शहरातील प्रत्येक नागरिकाने पाण्याचे महत्त्व ओळखून दैनंदिन जीवनात पाणी बचतीच्या सवयी अंगीकाराव्यात. पिण्याच्या पाण्याचा अनावश्यक वापर टाळून उपलब्ध पाण्याचे योग्य नियोजन केल्यास भविष्यातील पाणीटंचाईचा सामना करण्यास मदत होईल, असा संदेश नगरपरिषद प्रशासनाने दिला आहे.
पाण्याचा प्रत्येक थेंब महत्त्वाचा : मुख्याधिकारी कौस्तुभ गव्हाणे
"पाणी ही आपल्या जीवनातील अत्यंत महत्त्वाची नैसर्गिक संपत्ती आहे. पाण्याचा अपव्यय टाळणे ही केवळ प्रशासनाचीच नव्हे, तर प्रत्येक नागरिकाची जबाबदारी आहे. नागरिकांनी घरातील नळ व्यवस्थित बंद ठेवावेत, नळांची किंवा पाण्याच्या टाक्यांची गळती आढळल्यास ती तातडीने दुरुस्त करून घ्यावी. पिण्याच्या पाण्याचा वापर आवश्यकतेनुसार आणि नियोजनपूर्वक करावा. नगरपरिषद प्रशासनाच्या पाणी बचतविषयक आवाहनाला नागरिकांनी सकारात्मक प्रतिसाद देऊन सहकार्य करावे."
पाणी बचतीसाठी नागरिकांनी लोकसहभाग वाढवावा : नगराध्यक्षा संगीता महेश बोलमवार
"शहराचा सर्वांगीण विकास साधताना नागरिकांना आवश्यक सुविधा उपलब्ध करून देण्याबरोबरच पाण्यासारख्या नैसर्गिक संसाधनांचे संवर्धन करणेही महत्त्वाचे आहे. पाणी बचत ही प्रत्येक घरातून सुरू झाली पाहिजे. नागरिकांनी पिण्याच्या पाण्याचा अपव्यय टाळावा, पावसाचे पाणी साठवण्यावर भर द्यावा आणि पाणी संवर्धनाच्या उपक्रमांमध्ये सहभागी व्हावे. प्रशासन आणि नागरिक यांच्या संयुक्त प्रयत्नांतूनच शहरात पाणी बचतीची प्रभावी चळवळ उभी राहू शकते."
पाणीपुरवठ्याचे योग्य नियोजन करा; गळती तातडीने रोखा : उपाध्यक्ष महेश बोलमवार
"पाणीपुरवठा सुरळीत ठेवण्यासाठी पाण्याचा काटकसरीने वापर करणे आणि उपलब्ध पाण्याचे योग्य नियोजन करणे आवश्यक आहे. नागरिकांनी घरगुती वापरात पाणी वाया जाणार नाही, याची दक्षता घ्यावी. सार्वजनिक नळांची गळती, पाणीपुरवठा यंत्रणेतील दोष किंवा पाण्याचा अनावश्यक अपव्यय निदर्शनास आल्यास नगरपरिषदेच्या पाणीपुरवठा विभागाला कळवावे. नागरिकांच्या सहकार्यामुळे पाण्याची बचत करण्यास आणि उपलब्ध पाण्याचा अधिक प्रभावी वापर करण्यास मदत होईल."
रेन वॉटर हार्वेस्टिंगचा अवलंब करण्याचे आवाहन
पाण्याची बचत करण्याबरोबरच पावसाच्या पाण्याचे संवर्धन करणेही आवश्यक आहे. त्यामुळे घरांच्या छतावर पडणारे पावसाचे पाणी साठवण्यासाठी रेन वॉटर हार्वेस्टिंग प्रणालीचा वापर करावा. तसेच भूजलपातळी वाढण्यास मदत व्हावी यासाठी योग्य ठिकाणी सोक पिट अर्थात शोषखड्ड्यांची व्यवस्था करावी, असे आवाहन नगरपरिषद प्रशासनाने केले आहे.
घरातील नळ, शॉवर आणि पाण्याच्या टाक्यांमधून होणारी गळती तातडीने दुरुस्त करावी. वापरलेल्या पाण्याचा शक्य असेल तेथे योग्य पद्धतीने पुनर्वापर करावा. सार्वजनिक नळांमधून पाणी वाया जात असल्याचे आढळल्यास नागरिकांनी पाणीपुरवठा विभागाला माहिती द्यावी, असेही प्रशासनाने स्पष्ट केले आहे.
पाणी बचत ही काळाची गरज!
पाणी ही मर्यादित आणि अमूल्य नैसर्गिक संपत्ती असून, तिचे संवर्धन करणे ही काळाची गरज बनली आहे. भविष्यातील पाणीटंचाई टाळण्यासाठी आजपासूनच पाण्याचा काटकसरीने वापर करणे आवश्यक आहे. त्यामुळे धर्माबाद शहरातील नागरिकांनी पाणी बचतीच्या मोहिमेत सक्रिय सहभाग नोंदवून प्रशासनाला सहकार्य करावे. 'पाणी वाचवा, पाणी जिरवा आणि भविष्यातील पिढ्यांसाठी जलसंपत्ती जतन करा', असा संदेश धर्माबाद नगरपरिषदेच्या वतीने देण्यात आला आहे.
