Latur Police Conduct Midnight Combing Operation
लातूर, पुढारी वृत्तसेवा : जिल्ह्यात कायदा व सुव्यवस्था अबाधित ठेवण्यासाठी आणि गुन्हेगारी प्रवृत्तीवर नियंत्रण आणण्यासाठी लातूर पोलीस दलाने १६ ते १७ मे दरम्यान मध्यरात्री अचानक 'ऑलआऊट' व 'कोंबिंग ऑपरेशन' राबविले. पोलीस अधीक्षक अमोल तांबे यांच्या आदेशान्वये तसेच अपर पोलीस अधीक्षक मंगेश चव्हाण यांच्या मार्गदर्शनाखाली ही विशेष मोहीम राबविण्यात आली.
या कारवाईत जिल्हा पोलीस दलातील ३३ अधिकारी व १४५ पोलीस अंमलदार सहभागी झाले होते. या मोहिमेदरम्यान पोलीस रेकॉर्डवरील सराईत गुन्हेगारांच्या घरांवर अचानक भेट देऊन त्यांच्या हालचालींची तपासणी करण्यात आली.
त्यांच्या सध्याच्या राहणीमान, व्यवसाय व वर्तनातील बदलांची सखोल चौकशी करण्यात आली. विशेषतः मालमत्ताविषयक गुन्हे करण्याची शक्यता असलेल्या व्यक्तींवर लक्ष केंद्रित करून त्यांना समज देण्यात आली. या कारवाईत ४ जणांवर अवैध शस्त्र बाळगल्याप्रकरणी शस्त्र अधिनियमांतर्गत गुन्हे दाखल करण्यात आले असून त्यांच्याकडील शस्त्रे जप्त करण्यात आली आहेत.
दहशत निर्माण करण्याच्या उद्देशाने शस्त्र बाळगणाऱ्यांवर पोलिसांनी कठोर भूमिका घेतली आहे. तसेच ५ संशयित व्यक्तींविरुद्ध प्रतिबंधात्मक गुन्हे दाखल करण्यात आले आहेत. मोहिमेदरम्यान ३५ सराईत गुन्हेगारांची तपासणी करून त्यांना भविष्यात कोणतेही समाजविघातक कृत्य न करण्याबाबत समज देण्यात आली. याशिवाय ११७ लॉजेस व हॉटेल्सची तपासणी करण्यात आली तसेच ३० संवेदनशील ठिकाणांना भेटी देण्यात आल्या.
जिल्ह्यात ३३ ठिकाणी नाकाबंदी करून ४२३ संशयित वाहनांची तपासणी करण्यात आली. यामध्ये मद्यपान करून वाहन चालवणाऱ्या ७ वाहनचालकांवर कारवाई करण्यात आली.
