संग्राम वाघमारे
चाकूर: लातूर–नांदेड महामार्गावर वसलेले चाकूर हे तालुक्याचे प्रमुख शहर असतानाही येथे उभारण्यात येणारे ट्रामा केअर सेंटर निधी अभावी ओस पडले आहे. तब्बल ७ वर्षांनीही याचे काम झाले नसल्याने या महामार्गावर सातत्याने होणाऱ्या अपघातग्रस्तांचे प्राण धोक्यात आले असून याला जबाबदार कोण? असा सवाल नागरिकांकडून विचारला जात आहे.
राष्ट्रीय महामार्गांवरील अपघातांतील गंभीर जखमी रुग्णांची संख्या दिवसेंदिवस वाढत आहे. अपघात झाल्यानंतर ‘गोल्डन अवर’मध्ये तातडीच्या उपचारांची आवश्यकता असताना चाकूरमध्ये सक्षम ट्रामा सुविधा उपलब्ध नसल्याने रुग्णांना थेट लातूर येथे हलवावे लागत आहे. या विलंबामुळे अनेक वेळा रुग्णांची प्रकृती गंभीर बनत असून काही प्रकरणांत अनेकांना आपला जीव गमवावा लागला आहे. याचे वास्तव लपून राहिलेले नाही.
२०१४ ला येथील ट्रामा केअर सेंटरच्या कामासाठी मंजूरी मिळाल्यानंतर २०१८ ला तांत्रिक मान्यता मिळून २०१९ पासून कामाला सुरुवात झाली. या कामासाठी शासनाकडून ४ कोटी ५ लाखांचा खर्च केला गेला. परंतु या निधीमध्ये ट्रामा सेंटरचे काम पूर्ण झाले नाही. उर्वरित कामासाठी जवळपास २ कोटी ७ लाख रुपयाची आवश्यकता आहे.
मुंबईच्या एका कंपनीला सदरील काम सुटले आहे. या कामास २४ नोव्हेंबर २०२० अन्वये २५ एप्रिल २०२१ पर्यंत प्रथम मुदतवाढ देण्यात आली होती. दोन वर्षाच्या कालावधीनंतर २०२२ ला दुसरी मुदतवाढ दिली. तिसरी मुदत ३१ मार्च २०२३ ला वाढीचा प्रस्ताव अधीक्षक अभियंता लातूर यांनी मुख्य अभियंता नांदेड यांना दिला आहे. या कामासाठी आतापर्यंत ४ कोटी ७ लाख रुपये खर्च झाला आहे. उर्वरित दरवाज्याचे पट बसविणे,प्लम्बिंगचे काम, सेप्टीक टँकचे काम व साडपाणी पाईप लाईन, चेंबर्स, रंगकाम करणे व इतर किरकोळ कामे करणे बाकी आहे. तसेच या परिसरात सिमेंट काँक्रीट रस्ते तयार करणे,पावसाच्या पाण्याचे जलपुनर्भरण करणे, पंपहाऊस पाण्याच्या टाकीसह बांधणे, ध्वजस्तंभाचे बांधकाम करणे, वॉचमनसाठी खोली काम करणे, वाहनतळाचे बांधकाम करणे व जुने बांधकाम पाडणे ही कामे करणे बाकी असून यासाठी २ कोटी ७ लाख रुपये वाढीव निधीची आवश्यकता असून त्या निधीची मागणी सार्वजनिक बांधकाम व आरोग्य विभागाने केली आहे.
या निधीच्या आभावामुळे चाकूरचे ट्रामा केअर अपूर्ण असून सध्या ही इमारत ओस पडलेली आहे. एकीकडे शासन आरोग्य सुविधा बळकट करण्याचे दावे करत असताना, दुसरीकडे प्रत्यक्षात मात्र अपघातग्रस्त रुग्णांना प्राथमिक अत्यावश्यक उपचारही मिळत नसल्याचे विदारक चित्र चाकूरमध्ये दिसून येत आहे.
चाकूरसह आजूबाजूच्या ग्रामीण भागातील नागरिकांसाठी हे ट्रामा केअर जीवनदायी ठरू शकते. मात्र, आरोग्य विभागाच्या दुर्लक्षामुळे व निधी वितरणातील उदासीनतेमुळे हे केंद्र केवळ ‘शासनाच्या अपयशाचे प्रतीक’ बनत चालले आहे. या गंभीर बाबीकडे शासनाने तातडीने लक्ष देऊन निधी मंजूर करावा, रखडलेले बांधकाम तत्काळ पूर्ण करावे अन्यथा वाढत्या अपघातांना शासनाची जबाबदारी ठरवली जाईल, असा संतप्त सूर नागरिकांमधून उमटत आहे. दरम्यान वैद्यकीय अधिक्षक डॉ जयस्वाल यांच्याशी संपर्क केला असता. प्रथम ट्रामाचे बांधकाम पूर्ण होणे गरजेचे आहे. बाकी वैद्यकीय उपकरणे, मनुष्यबळ उपलब्ध करून देणे ही जबाबदारी आरोग्य विभागाची असल्याचे सांगितले.
यासंदर्भात सार्वजनिक बांधकाम विभागाचे उपविभागीय अभियंता सुरज गोंड यांच्याशी संपर्क केला असता त्यांनी ट्रामा केअर सेंटरच्या उर्वरित कामासाठी २ कोटी ७ लाखाचा प्रस्ताव मंत्रालयात मंजुरीसाठी पाठविला आहे. त्या प्रस्तावास मार्चच्या अगोदर मंजुरी मिळणार असून निधीही उपलब्ध होणार असल्याचे सांगितले.
ट्रॉमा केअर युनिटच्या अपूर्ण कामामुळे रुग्णाला आरोग्य सुविधांसाठी जिल्ह्याच्या ठिकाणी जाण्याची वेळ रुग्णांवर आलेली आहे. आज चाकूर येथील दोन युवकांचा चापोलीकडे जाताना भीषण अपघात झाला. यामध्ये दोघेही गंभीर जखमी झाले, असून त्यांना उपचारासाठी लातूरला हलविण्यात आले आहे. ट्रामा केअरचे काम पूर्ण झाले असते तर रुग्णांना वेळेत उपचार मिळाले असते. आणखीन किती बळीची वाट पाहत आहे, अशी प्रतिक्रिया उपस्थित नागरिकांनी पुढारीशी बोलताना दिली.
