अहमदपूर : जिल्हा परिषद व पंचायत समिती निवडणूक मतमोजणीच्या पाश्र्वभूमीवर शहरातील औद्योगिक प्रशिक्षण संस्थेत ९ फेब्रुवारी रोजी सोमवारी सकाळी १० वाजल्यापासून सुरुवात होणार असून या मतमोजणीसाठी प्रशासनाच्या वतीने जय्यत तयारी करण्यात आली आहे.
तालुक्यातील ६ जिल्हा परिषद व १२ पंचायत समिती गणासाठी ७ फेब्रुवारी रोजी मतदान झाले. तालुक्यातील २०० मतदान केंद्रावर ८३९४६ पुरुष व ७६७४७ अशा एकूण १६०६९३ मतदारांपैकी ५४८९५ पुरुष व ४९७८४ स्री अशा १०४६७९ मतदारांनी मतदानाचा आपला हक्क बजावला.सरासरीच्या ६५•१४ % मतदान शांततेत पार पडले आहे.
जिल्हा परिषदेच्या ६ जागांसाठी २७ व पंचायत समितीच्या १२ जागांसाठी ३८ उमेदवाराचे भवितव्य मतपेटीत बंद झाले असून त्याच्या भवितव्याचा फैसला आज होणार आहे. निवडणूक निर्णय अधिकारी मंजुषा लटपटे व सहाय्यक निवडणूक निर्णय अधिकारी उज्वला पांगारकर यांच्या मार्गदर्शनाखाली प्रशासन सज्ज झाले आहे.
मतमोजणीसाठी मुख्य सभागृहात १४ टेबल असून,आपत्कालीन स्थितीसाठी ४ टेबल राखीव ठेवण्यात आले आहेत.पोस्टल मतपत्रिकेसाठी स्वतंत्र ३ टेबल आणि २ राखीव टेबलची व्यवस्था करण्यात आली आहे.मतमोजणीची प्रक्रिया निर्दोष पार पाडण्यासाठी प्रत्येक टेबलवर सूक्ष्म नियोजन करण्यात आले आहे.प्रत्येक टेबलवर एक क्षेत्रीय अधिकारी,एक मास्टर ट्रेनर,एक सहाय्यक कर्मचारी व शिपाई असे चार जणांचे पथक कार्यरत राहणार आहे.
या महत्त्वपूर्ण कामासाठी स्ट्राँग रूम नियंत्रणाची जबाबदारी नायब तहसीलदार संतोष अनर्थे व संजय भोसीकर, संगणक कक्षाची जबाबदारी नायब तहसीलदार अभिलाष जगताप ,टॅब्युलेशनची जबाबदारी उपकोषागार अधिकारी जी. एन. गोपवाड,साहित्य पुरवठा नामदेव अर्जुने व भोजन व्यवस्था पुरवठा निरीक्षक शुभांगी जवादे यांच्यावर सोपवण्यात आली आहे. उपविभागीय पोलीस अधिकारी अरविंद रायबोले व पोलीस निरीक्षक विनोद मेत्रेवार यांच्या नियंत्रणात कडेकोट पोलीस बंदोबस्तात ही मतमोजणी होणार आहे. मतमोजणीत पारदर्शकता राहावी यासाठी मतमोजणीच्या ठिकाणी व इतरत्र सीसीटीव्ही कॅमेरे बसवण्यात आले आहेत.मतमोजणीचे चित्रीकरणही केले जाणार आहे.कोणत्या पक्षाला कौल मिळणार याची उत्सुकता सर्वांना लागली आहे?
