लातूर: अखिल भारतीय छावा संघटनेचे प्रदेशाध्यक्ष विजयकुमार घाडगे-पाटील हे रुग्णालयातून थेट रुग्णवाहिकेतून उपमुख्यमंत्री अजित पवार यांच्या भेटीसाठी मुंबईकडे रवाना झाले आहेत. शेतकऱ्यांच्या प्रश्नावर जाब विचारल्याने आपल्यावर झालेल्या प्राणघातक हल्ल्याचा जाब विचारण्यासाठी ते पवार यांची भेट घेणार असून, भेट न मिळाल्यास थेट राज्यपालांच्या दारात आंदोलन करण्याचा इशारा त्यांनी दिला आहे.
हॉस्पिटलमधून डिस्चार्ज मिळाल्यानंतर विजयकुमार घाडगे पाटील यांनी रुग्णवाहिकेतूनच मुंबईच्या दिशेने प्रवास सुरू केला आहे. प्रवासादरम्यान ते प्रथम तुळजापूरला थांबून आई तुळजाभवानीचे दर्शन घेणार आहेत आणि त्यानंतर मुंबईकडे मार्गस्थ होतील. एका संघटनेच्या प्रदेशाध्यक्षाने अशा प्रकारे रुग्णवाहिकेतून थेट उपमुख्यमंत्र्यांच्या भेटीला निघाल्याने या प्रकरणाचे गांभीर्य वाढले आहे.
या भेटीमागे आपला एकच उद्देश असल्याचे घाडगे पाटील यांनी स्पष्ट केले आहे. ते म्हणाले, "शेतकऱ्यांच्या प्रश्नावर जाब विचारला म्हणून एखाद्यावर प्राणघातक हल्ला करणे, हे कोणत्या नियमात बसते? हाच सवाल मी उपमुख्यमंत्री अजित पवार यांना विचारणार आहे." त्यांच्या या भूमिकेमुळे या भेटीकडे सर्वांचे लक्ष लागले आहे.
विजयकुमार घाडगे पाटील यांनी आपली भूमिका अत्यंत ठामपणे मांडली आहे. त्यांनी म्हटले आहे की, "जर उपमुख्यमंत्री अजित पवार यांनी भेट नाकारली, तर आम्ही मुख्यमंत्री देवेंद्र फडणवीस यांची भेट घेऊ. मुख्यमंत्र्यांनीही भेट नाकारल्यास, आम्ही न्यायासाठी थेट राज्यपालांच्या दारात जाऊन बसू, पण आम्ही मागे हटणार नाही."
या प्रकरणामुळे राज्यातील राजकीय वातावरण तापण्याची शक्यता आहे. शेतकऱ्यांच्या मुद्द्यावरून झालेल्या या कथित हल्ल्यानंतर आता उपमुख्यमंत्री अजित पवार हे विजयकुमार घाडगे पाटील यांना भेटणार का आणि यावर काय भूमिका घेणार, याकडे संपूर्ण राज्याचे लक्ष लागले आहे.
