जालना : शहरातील एमआयडीसी परिसरात अवैधरीत्या धारदार खंजर बाळगून दहशत निर्माण करणाऱ्या दोन युवकांना चंदनझिरा पोलिसांनी ताब्यात घेत त्यांच्या जवळून दोन धारदार खंजर जप्त केले.
पोलिसांनी दिलेल्या माहितीनुसार, परिसरात दोन युवक धारदार शस्त्रे घेऊन फिरत असल्याची माहिती पोलिस निरीक्षक बाळासाहेब पवार यांना मिळाली होती. त्यानुसार पोलिस पथकाने परिसरातील स्वराज पार्किंगसमोरील रस्त्यावर सापळा रचून दोघांना ताब्यात घेतले. झडतीदरम्यान त्यांच्या जवळून दोन धारदार खंजर आढळून आले.
या प्रकरणी ओमकार शामसुंदर सिंघल (वय 22, रा. संतोषीमाता नगर, मुकुंदवाडी, छत्रपती संभाजीनगर) आणि ओमकार गिरीजाशंकर शेळके (वय 21, रा. धनगर पिंप्री, ता. अंबड, जि. जालना) यांच्याविरुद्ध भारतीय हत्यार कायद्यान्वये गुन्हे दाखल करण्यात आले आहेत.
सदर कारवाई पोलिस अधीक्षक तेगबीर सिंह संधू, अपर पोलिस अधीक्षक विक्रम साळी व उपविभागीय पोलिस अधिकारी अनंत कुलकर्णी यांच्या मार्गदर्शनाखाली पोलिस निरीक्षक बाळासाहेब पवार यांच्या नेतृत्वाखाली सपोनि मनसुब वेताळ, प्रशांत देशमुख, कृष्णा तंगे व रवींद्र देशमुख यांनी केली.
