जालना : दक्षिण मध्य रेल्वेच्या नांदेड विभागात रेल्वे स्थानके आणि गाड्यांमधील अनधिकृत फेरीविक्रीविरोधात राबविण्यात आलेल्या विशेष मोहिमेत ४७ फेरीवाल्यांवर कारवाई करण्यात आली. या कारवाईत संबंधितांकडून ३६ हजार ८५० रुपयांचा दंडही वसूल करण्यात आला.
प्रवाशांच्या सुरक्षिततेसह रेल्वे स्थानकांची स्वच्छता आणि सुरळीत व्यवस्था कायम राखण्यासाठी दक्षिण मध्य रेल्वेच्या निर्देशानुसार नांदेड विभागात अनधिकृत फेरीवाल्यांविरोधात विशेष मोहीम राबविण्यात आली.
१३ ते १९ जुलै या कालावधीत झालेल्या या कारवाईत ४७ अनधिकृत फेरीवाल्यांवर दंडात्मक कारवाई करण्यात आली असून त्यांच्याकडून ₹३६ हजार ८५० इतका दंड वसूल करण्यात आला.
दरम्यान, रेल्वे प्रशासनाने प्रवाशांना खाद्यपदार्थ व इतर वस्तूंची खरेदी अधिकृत रेल्वे विक्रेते, कॅन्टीन व स्टॉल्स यांच्याकडूनच करण्याचे आवाहन केले आहे. तसेच अनधिकृत फेरीवाले आढळल्यास रेल्वे कर्मचारी किंवा रेल्वे हेल्पलाईन क्रमांक १३९ वर तातडीने माहिती देण्याचेही आवाहन करण्यात आले आहे.
या दरम्यान राबविण्यात आली विशेष मोहीम
ही विशेष मोहीम मनमाड–जालना, पूर्णा–अकोला, नांदेड–पूर्णा, पूर्णा–छत्रपती संभाजीनगर, मुदखेड–छत्रपती संभाजीनगर, पूर्णा–वाशिम, आदिलाबाद–मुदखेड आणि पूर्णा–परळी वैजनाथ या रेल्वे मार्गांवर राबविण्यात आली.
