Pay a rate of five thousand rupees per tonne for sugarcane
वडीगोद्री, पुढारी वृत्तसेवा : चालू गाळप हंगाम २०२६-२७ साठी ऊसाला प्रति टन ५ हजार रुपये अंतिम दर जाहीर करावा, तसेच मागील गाळप हंगामातील उसाला एफ.आर.पी. अधिक ३०० रुपये प्रति टन अंतिम दर देण्यात यावा, अशी मागणी स्वाभिमानी शेतकरी संघटनेने कर्मयोगी अंकुशराव टोपे समर्थ सहकारी साखर कारखान्याचे मार्गदर्शक, माजी मंत्री राजेश टोपे यांच्याकडे निवेदनाद्वारे केली.
माजी मंत्री राजेश टोपे यांना दिलेल्या निवेदनात म्हटले की, यंदा चालू हंगामात राज्यात ऊस टंचाई निर्माण झाली आहे. त्यामुळे साखरेचे उत्पादन कमी होणार आहे. सध्या बाजारात साखरेला मिळणाऱ्या विक्रमी दरामुळे पहिली उचल ४२०० रुपये आणि अंतिम बिल ५ हजार रुपये प्रति टन असा ऊसदर जाहीर करावा, तसेच मागील गाळप हंगामात कारखान्याला ऊस पुरवठा केलेल्या शेतकऱ्यांना एफ.आर.पी. अधिक ३०० रुपये प्रति टन अंतिम दर देण्यात यावा, अशी स्वाभिमानी शेतकरी संघटनेने केली आहे.
शेतकऱ्यांच्या उत्पादन खर्चात सातत्याने वाढ होत असताना केवळ एफ.आर.पी.च्या आधारे ऊसदर निश्चित करणे शेतकऱ्यांच्या दृष्टीने अन्यायकारक आहे. साखर व उपपदार्थांच्या बाजारमूल्यात वाढ होत असल्याने त्याचा योग्य हिस्सा ऊसउत्पादक शेतकऱ्यांना मिळणे आवश्यक आहे. त्यामुळे मागील हंगामातील ऊसाला एफ.आर.पी. अधिक ३०० रुपये अंतिम दर देण्याची मागणी जिल्हाध्यक्ष सुरेश काळे यांनी केली आहे. यावेळी स्वाभिमानी शेतकरी संघटनेचे जिल्हाध्यक्ष सुरेश काळे, अंबड तालुकाध्यक्ष राजेंद्र खटके आणि युवा नेते राहुल गढेकर उपस्थित होते.
