जालना : राज्यातील जिल्हा परिषद आणि पंचायत समित्यांमध्ये कार्यरत वर्ग-३ मधील लिपिकवर्गीय कर्मचार्यांवच्या पदोन्नती प्रक्रियेला गती देण्यासाठी राज्य मंत्रिमंडळाने महत्त्वपूर्ण निर्णय घेतला आहे. कनिष्ठ प्रशासन अधिकारी आणि सहायक प्रशासन अधिकारी या दोन संवर्गांचे एकत्रीकरण करून एस-१४ वेतनश्रेणीमध्ये सहायक प्रशासन अधिकारी हा एकच संवर्ग निर्माण करण्यास मान्यता देण्यात आली आहे. या निर्णयामुळे लिपिकवर्गीय कर्मचार्‍यांच्या पदोन्नतीचा मार्ग अधिक सुलभ होणार असून, त्यांना आश्वासित प्रगती योजनेअंतर्गत पुढील वेतनश्रेणीचे लाभ मिळण्यासही मदत होणार आहे.
मंगळवार, दि. २७ रोजी झालेल्या राज्य मंत्रिमंडळाच्या बैठकीत हा निर्णय घेण्यात आला. ग्रामविकास विभागांतर्गत जिल्हा परिषद आणि पंचायत समित्यांमध्ये कार्यरत असलेल्या वर्ग-३ मधील लिपिकवर्गीय कर्मचार्‍यांच्या पदोन्नतीतील अडथळे दूर करण्याच्या दृष्टीने हा निर्णय महत्त्वाचा मानला जात आहे. या संवर्गांचे एकत्रीकरण झाल्यामुळे प्रशासकीय कामकाजातील फाईल मंजुरीचा एक टप्पा कमी होणार आहे.
परिणामी, नागरिकांना पुरविल्या जाणार्‍या विविध सेवांच्या प्रक्रियेला गती मिळण्याची अपेक्षा आहे. तसेच लिपिकवर्गीय कर्मचार्‍यांच्या सेवेत पदोन्नतीच्या संधी वाढण्यासह पदोन्नती प्रक्रिया जलद होण्याचा मार्ग मोकळा झाला आहे. जालनाचे आमदार अर्जुनराव खोतकर, भोकरदन आमदार संतोष दानवे यांचे विशेष सहकार्य लाभले.
या निर्णयासाठी महाराष्ट्र राज्य जिल्हा परिषद लिपिकवर्गीय कर्मचारी संघटनेचे राज्य मुख्य सचिव बापुसाहेब कुलकर्णी यांच्या मार्गदर्शनाखाली राज्य अध्यक्ष सागर बबर, राज्य सचिव अरुण जोर्वेकर, कोषाध्यक्ष उमाकांत सूर्यवंशी, कार्याध्यक्ष पंकज गुल्हाने, उपाध्यक्ष संजय चव्हाण, संजय जगताप, मराठवाडा विभागप्रमुख अनिल भेरे-पाटील, जालना जिल्हा अध्यक्ष भाऊसाहेब हरकळ, उपाध्यक्ष सनी कटकम, सचिव यांच्यासह संपुर्ण कार्यकारिणी व सदस्यांनी परिश्रम घेतले आहे.
दोन संवर्गांचे एकत्रिकरण
जिल्हा परिषदेतील वर्ग-३ लिपिक वर्गीय कर्मचार्‍यांमधील कनिष्ठ प्रशासन अधिकारी आणि सहायक प्रशासन अधिकारी या दोन संवर्गाचे एकत्रिकरण करण्यात येऊन एस-१४ या वेतन श्रेणीमध्ये सहायक प्रशासन अधिकारी हा एकच संवर्ग निर्माण करण्याच्या प्रक्रियेमध्ये लिपिक संघटनेस राज्याचे मुख्यमंत्री देवेंद्र फडणविस, उपमुख्यमंत्री एकनाथ शिंदे, उपमुख्यमंत्री सुनेत्रा पवार, ग्रामविकास राज्यमंत्री योगेश कदम, माजी ग्रामविकास विभागाचे प्रधान सचिव एकनाथ डवले, सध्याचे ग्रामविकास प्रधान सचिव चंद्रकांत पुलकंडवार यांचे विशेष सहकार्य लाभले.
