परतूर: संपूर्ण जिल्ह्याचे लक्ष लागून असलेल्या परतूर नगरपालिकेच्या सार्वत्रिक निवडणुकीचा निकाल दि. 21 डिसेंबर रोजी जाहीर झाला असून, अत्यंत चुरशीच्या झालेल्या या लढतीत भारतीय जनता पक्षाच्या प्रियंका शहाजी राक्षे यांनी नगराध्यक्षपदाच्या खुर्चीवर कब्जा मिळवला आहे. त्यांनी आपल्या प्रतिस्पर्धी राष्ट्रवादी काँग्रेस (अजित पवार गट) उमेदवार शांताबाई बाबू हिवाळे यांचा १७१९ मतांच्या फरकाने पराभव केला. नगरसेवक पदाच्या निवडणुकीत भाजप आणि राष्ट्रवादी (शरद पवार गट) यांच्यात 'कांटे की टक्कर' पाहायला मिळाली असून मतदारांनी संमिश्र कौल दिला आहे.
नगराध्यक्ष पदाचा निकाल
नगराध्यक्ष पदासाठी झालेल्या अटीतटीच्या लढतीत भाजपच्या प्रियंका राक्षे यांना ९१९५ मते मिळाली, तर राष्ट्रवादी (अजित पवार गट) च्या शांताबाई हिवाळे यांना ७४७६ मते मिळाली. काँग्रेसच्या प्रतिभा सिद्धार्थ बंड यांनी ४३६७ मते घेत तिसरे स्थान पटकावले. या निवडणुकीत एकूण २३,२७८ मतदारांनी आपला हक्क बजावला होता.
पक्षीय बलाबल: कुणाचे किती नगरसेवक?
परतूर नगरपालिकेच्या सभागृहात यावेळेस सत्तास्थापनेसाठी मोठी रस्सीखेच पाहायला मिळणार आहे. भाजप आणि राष्ट्रवादी (शरद पवार गट) प्रत्येकी ६ जागांसह आघाडीवर आहेत.
* भाजपा: ०६
* राष्ट्रवादी (शरद पवार गट): ०६
* राष्ट्रवादी (अजित पवार गट): ०५
* भारतीय राष्ट्रीय काँग्रेस: ०३
* शिवसेना (उबाठा): ०३
प्रभागांमधील विजयी रणधुमाळी:
प्रभाग १: भाजपच्या सोनोने रत्नमाला (१३३७ मते) आणि १ ब मधून भाजपचेच कुरेशी शेख इमरान मुन्सी (१५९६ मते) विजयी झाले. भाजपची येथे चांगली सुरुवात झाली.
प्रभाग २: राष्ट्रवादी (श. प.) चे ऋषिकेश कऱ्हाळे (८०२ मते) विजयी झाले, तर २ ब मध्ये भाजपच्या स्नेहा अग्रवाल (८१३ मते) यांनी बाजी मारली.
प्रभाग ३: राष्ट्रवादी अजित पवार गटाचे खतीब शाकीरोद्दीन (८४८ मते) तर प्रभाग ३ ब मध्ये राष्ट्रवादी शरद पवार गटाच्या काजी तय्यबा फातेमा (८७० मते) विजयी झाल्या.
प्रभाग ४: येथे काँग्रेसचे पूर्ण वर्चस्व राहिले. अन्सारी रुबीना मोहम्मद मुस्ताक (८४२ मते) आणि शेख कादिर अब्दुल्ला (११५६ मते) यांनी विजय संपादन केला.
प्रभाग ५: राष्ट्रवादी अजित पवार गटाच्या सय्यद तहसीन बेगम (१००२ मते) विजयी झाल्या, तर ५ ब मध्ये काँग्रेसचे कुरेशी रज्जाक लतीफ (८०२ मते) विजयी झाले.
प्रभाग ६ ते ८: प्रभाग ६ अ मध्ये राष्ट्रवादी (श. प.) च्या शीला राऊत (९४५ मते) तर ६ ब मध्ये भाजपचे प्रकाश चव्हाण (९७७ मते) विजयी झाले. प्रभाग ७ मध्ये राष्ट्रवादी शरद पवार गटाचे वर्चस्व राहिले, जिथे शेख तौसिफ़ सज्जाद आणि सरस्वती तेलगड विजयी झाले. प्रभाग ८ अ मध्ये भाजपचे डॉ. प्रदीप सातोनकर (९८० मते) तर ८ ब मध्ये राष्ट्रवादी शरद पवार गटाच्या विशाखा राखे (१०३९ मते) यांनी बाजी मारली.
प्रभाग ९ ते ११: प्रभाग ९ मध्ये भाजपच्या पूजा काळे आणि शिवसेना (उबाठा) चे गणेश नळगे विजयी झाले. प्रभाग १० मध्ये राष्ट्रवादी अजित पवार गटाच्या कल्पना डहाळे (१७२६ मते - सर्वाधिक मते), शिवसेना (उबाठा) च्या मिरा कदम आणि राष्ट्रवादी अजित पवार गटाचे राजेश खंडेलवाल विजयी झाले. प्रभाग ११ मध्ये राष्ट्रवादी अजित पवार गटाचे बाबू नाथा हिवाळे आणि शिवसेना (उबाठा) च्या माधवी संतोष पवार विजयी झाल्या.
चुरशीची आकडेवारी
या निवडणुकीत मतदारांचा कल अत्यंत विभागलेला राहिला. ३३,०९६ एकूण मतदारांपैकी २३,२७८ मतदान झाले. नगराध्यक्षपदासाठी भाजपच्या प्रियंका राक्षे यांनी सुरुवातीपासून घेतलेली आघाडी शेवटपर्यंत टिकवून ठेवली आणि १७१९ मतांच्या फरकाने विजय मिळवला.
एकूणच, परतूर पालिकेत सत्ता स्थापनेसाठी आता राजकीय चालींना वेग येणार आहे. नगराध्यक्ष पद भाजपकडे असले तरी नगरसेवक संख्येत महाविकास आघाडीच्या घटक पक्षांची (राष्ट्रवादी श.प., काँग्रेस, उबाठा) ताकद मोठी असल्याने आगामी काळात उपनगराध्य साठी परतूरचे राजकारण अधिकच रंगतदार होणार आहे.
