जालना : कदीम जालना पोलिस ठाण्याच्या पथकाने चेन स्नॅचिंग व जबरी चोरीच्या गुन्ह्यांचा यशस्वी छडा लावत सहा गुन्हे उघडकीस आणले आहेत. या कारवाईत दोन आरोपींना अटक करण्यात आली असून त्यांच्याकडून तब्बल ११ लाख ३१ हजार ३०० रुपयांचा मुद्देमाल जप्त करण्यात आला आहे. अशी माहिती पोलिस अधीक्षक तेघबीर सिंग संधू यांनी दिली.
या संदर्भात मंगळवार, दि. ४ रोजी त्यांनी पत्रकार परिषद घेऊन ही माहिती दिली. दरम्यान, पाेलिस अधीक्षक तेघबीर सिंग संधू यांच्या मार्गदर्शनाखाली पोलिस कदीम जालना पोलिस ठाण्याचे निरीक्षक जनार्दन शेवाळे व तपास पथकाने तांत्रिक तपास आणि गोपनीय माहितीच्या आधारे आरोपींचा शोध घेत त्यांना ताब्यात घेतले. चौकशीत आरोपींनी पाच चेन स्नॅचिंग आणि एका जबरी चोरीच्या गुन्ह्याची कबुली दिली.
या कारवाईत सुमारे ६८.१९० ग्रॅम सोन्याचे दागिने, दोन मोबाईल फोन आणि एक डिस्कव्हर मोटारसायकल असा एकूण ११.३१ लाखांचा मुद्देमाल जप्त करण्यात आला. जप्त दागिन्यांमध्ये सोन्याच्या चेन, लॉकेट, अंगठ्या, मंगळसूत्र, मिनी गंठन तसेच इतर दागिन्यांचा समावेश आहे.
या प्रकरणी आदित्य सुरेश पाखरे (वय १९) व अरुण दगडू वाघचौरे (वय १९, दोघेही रा. चंदनझिरा, जालना) यांना अटक करण्यात आली आहे. आरोपींकडून आणखी गुन्हे उघडकीस येण्याची शक्यता असून त्यादृष्टीने पोलिसांचा तपास सुरू आहे.
ही कारवाई अप्पर पोलिस अधीक्षक विक्रम साळी व उपविभागीय पोलिस अधिकारी अनंत कुलकर्णी यांच्या मार्गदर्शनाखाली पोलिस निरीक्षक जनार्दन शेवाळे, पोउपनि दिनकर मोरे, पोहेकॉ. सचिन चौधरी, सदा राठोड, धनाजी कावळे, पोकाँ. मतीन शेख, पोकाँ. इम्रान खान, दिलीप गायकवाड, सदाशिव मुटकुळे आदींनी केली.
आरोपींची गुन्ह्याची कबुली
पाेलिसांनी केलेल्या चौकशीत दोन आरोपींनी पाच चेन स्नॅचिंग आणि एका जबरी चोरीच्या गुन्ह्याची कबुली दिली. त्यांच्याकडून सुमारे ११.३१ लाखांचा मुद्देमाल जप्त करण्यात आला आहे.
