जालना : युगांडातील सोलार कंत्राटाचे आमिष दाखवत जालना शहरातील एका व्यावसायिकाला 20 लाख रुपयांचा गंडा घातल्याचा प्रकार उघडकीस आला आहे.
युगांडामध्ये सोलार स्ट्रीट लाईटचे मोठे कंत्राट देण्याचे आमिष दाखवून एका व्यावसायिकाची तब्बल 20 लाख रुपयांची फसवणूक करण्यात आली आहे. याप्रकरणी लजपत परशुराम सचदेव (रा. एम.जी. रोड, जालना) यांनी सदर बाजार पोलिसांत तक्रार दिली आहे.
आरोपी अरुण लक्ष्मण बोरीचा (मुंबई), अनुप शाक्य, रश्मी शाक्य आणि विक्रांत कुशवाहा (सर्व रा. उत्तर प्रदेश) यांनी कट रचून इलाईट जीके इन्फ्रा प्रा. लि. कंपनीच्या नावे बनावट कागदपत्रे व गुगल मीटवर बैठका घेऊन विश्वास संपादन केला होता.
सुविधा शुल्क म्हणून 20 लाख रुपये उकळल्यानंतर आणि 500 नग सोलर स्ट्रीट पोल तयार करवून घेतल्यानंतर, त्यांनी मालाची उचल न करता आर्थिक फसवणूक केली. याप्रकरणी भारतीय न्याय संहितेनुसार फसवणुकीचा गुन्हा दाखल करण्यात आला आहे. या प्रकरणी सदर बाजार पोलिस अधिक तपास करीत आहे.
