Honorarium for ASHA workers delayed
पारध, पुढारी वृत्तसेवा : भोकरदन तालुक्यातील पारध बुद्रुक येथील आशासेविकांचे मानधन वेळेवर जमा होत नसल्याने त्यांच्या आर्थिक अडचणी वाढल्या आहेत. वाढीव मानधन फेब्रुवारीपासून अद्याप खात्यात जमा झालेले नाही, तर नियमित मासिक मानधनाचेही चार महिन्यांपासून पैसे मिळाले नसल्याची माहिती आहे. त्यामुळे आशासेविकांसमोर घरखर्च भागवायचा कसा, असा गंभीर प्रश्न निर्माण झाला आहे.
पारध बुद्रुक येथे ७, पारध खुर्द येथे २ आणि पद्मावती येथे १ अशा एकूण १० आशासेविका पारध उपकेंद्रांतर्गत कार्यरत आहेत. गावागावांत आरोग्य विभागाच्या विविध योजना, लसीकरण, गर्भवती महिलांची माहिती, आरोग्य सर्वेक्षण, जनजागृती यासह शासनाच्या आरोग्यविषयक विविध उपक्रमांची अंमलबजावणी करण्यासाठी या आशासेविका महत्त्वाची भूमिका बजावत आहेत. मात्र, नागरिकांच्या आरोग्यासाठी दिवसरात्र काम करणाऱ्या या आशासेविकांनाच त्यांच्या मानधनासाठी प्रतीक्षा करावी लागत असल्याने नाराजी व्यक्त होत आहे.
आशासेविकांना मिळणारे नियमित मासिक मानधन तब्बल चार महिन्यांपासून खात्यात जमा झालेले नसल्याचे सांगण्यात येत आहे. त्यातच फेब्रुवारीपासून वाढीव मानधनाची रक्कमही प्रलंबित असल्याने आर्थिक अडचणी आणखी वाढल्या आहेत. तातडीने मानधन देण्याची मागणी होत आहे.wwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwwww
