Accused arrested with foreign liquor; Goods worth one lakh seized
जालना, पुढारी वृत्तसेवाः अवैध विदेशी दारू विक्री करणाऱ्या एका आरोपीला जेरबंद करण्यात आले असून त्याच्याकडून एकूण १ लाख ३ हजार २२० रुपयांचा मुद्देमाल जप्त करण्यात आला आहे.
पोलिस ठाणे मोजपुरी हद्दीत स्थानिक गुन्हे शाखेचे पथक अवैध धंद्यांविरोधात गस्त घालत असताना जालना-मंठा रोडवरील बापकळ फाट्यावर आरोपी अरविंद प्रकाश लांडगे (रा. जामवाडी, ता. जालना) हा मोटारसायकलवरून विदेशी दारू विक्रीसाठी जात असल्याची माहिती मिळाली.
त्यानुसार सापळा रचून छापा टाकण्यात आला. या कारवाईत आरोपीकडून इम्पिरियल ब्लू व रॉयल स्टॅग कंपनीच्या विदेशी दारूच्या १९ बाटल्या तसेच सुमारे ८० हजार रुपये किंमतीची मोटारसायकल असा एकूण १,०३,२२० रुपयांचा मुद्देमाल जप्त करण्यात आला.
ही कारवाई पोलीस अधीक्षक अजय कुमार बंसल, अपर पोलीस अधीक्षक आयुष नोपाणी, उपविभागीय पोलीस अधिकारी अनंत कुलकर्णी, स्थानिक गुन्हे शाखेचे पोनि. पंकज जाधव यांच्या मार्गदर्शनाखाली सपोनि. योगेश उबाळे, पोलीस अंमलदार संभाजी तनपुरे, रुस्तुम जैवाळ, प्रभाकर वाघ, कैलास खार्डे, देविदास भोजने, इरशाद पटेल आदींनी केली.
