अनिल पोरवाल
जवळाबाजार : यंदाचा मार्च महिना हा सण आणि उत्सवांचा एक अनोखा संगम घेऊन आला आहे. होळीपासून ते महावीर जयंतीपर्यंत विविध धर्मांचे आणि संस्कृतींचे सण एकाच महिन्यात साजरे होणार असल्याने सर्वत्र आनंदाचे आणि उत्साहाचे वातावरण पाहायला मिळणार आहे. विविधतेत एकता दर्शवणारा हा महिना सर्वांसाठीच पर्वणी ठरणार आहे.
मार्च महिन्याच्या सुरुवातीलाच रंगांची उधळण करणारा होळी (२ मार्च) आणि रंगपंचमी (३ मार्च) उत्सव साजरा होईल. लहान मुलांपासून ते थोरामोठ्यांपर्यंत सर्वजण पारंपरिक पद्धतीने होळी साजरी करतील. यंदा आरोग्यदायी आणि कोरड्या रंगांचा वापर करण्यावर भर दिला जात आहे. बाजारपेठेतही नवनवीन पिचकाऱ्या आणि रंगांनी बहार धरली आहे.
यानंतर १९ मार्च रोजी गुढीपाडवा मोठ्या उत्साहात साजरा होईल. हिंदू नववर्षाच्या या दिवशी घरोघरी गुढ्या उभारल्या जातील. पाडव्यानिमित्त साखर गाठींचे वाटप करण्याची परंपरा असून, मागील वर्षाच्या तुलनेत यंदा साखरेच्या गाठी, खोबरे आणि खारीक यांच्या दरात थोडी वाढ दिसून येत आहे.
मार्चच्या उत्तरार्धात विविध धर्मांचे महत्त्वाचे सण साजरे होणार आहेत:
रमजान ईद (२१ मार्च): मुस्लिम बांधव महिनाभर उपवास केल्यानंतर मोठ्या उत्साहात आणि आनंदाने रमजान ईद साजरी करतील.
श्रीराम जन्मोत्सव (२६ मार्च): श्रीराम मंदिरांमध्ये सकाळपासून भाविकांची गर्दी उसळेल. टाळ-मृदंगाच्या गजरात भव्य मिरवणुका काढल्या जातील आणि महाप्रसादाचे वाटप केले जाईल.
श्री महावीर जयंती (३१ मार्च): जैन बांधवांकडून विशेष अभिषेक, आरती आणि भव्य शोभायात्रा काढली जाईल. दिवसभर धार्मिक कार्यक्रमांची रेलचेल असेल.
होळी, गुढीपाडवा, रमजान ईद, श्रीराम जन्मोत्सव आणि महावीर जयंती हे सर्व सण एकाच महिन्यात येणे हा एक दुर्मिळ योगायोग आहे. विविध समाजबांधव आपापले सण आपुलकीने आणि उत्साहाने साजरे करणार असल्याने, हा मार्च महिना खऱ्या अर्थाने 'एकतेचा आणि बंधुभावाचा' महिना ठरेल.
