Vasmat Hunger Strike
वसमत : एकीकडे गुरूवारी (दि. 17) संपूर्ण मराठवाड्यात 78 वा मराठवाडा मुक्ती संग्राम दिन मोठ्या उत्साहात साजरा होत असताना, दुसरीकडे वसमत तालुक्यातील भाग्यनगर, हट्टा येथील नागरिकांना मात्र आजही आपल्या हक्कासाठी लढा द्यावा लागत आहे. शासनमान्य खरेदीखत होऊन 6 वर्षे उलटूनही नमुना नंबर 8 रद्द करण्यात आल्याने संतप्त झालेल्या नागरिकांनी आजपासूनच (दि. 17) उपविभागीय अधिकारी कार्यालय, वसमत येथे आमरण उपोषणास सुरुवात केली आहे.
मुक्ती संग्राम दिनाचेच औचित्य साधून या नागरिकांनी प्रशासनाचे लक्ष वेधण्याचा प्रयत्न केला आहे. मराठवाडा निजामशाहीतून मुक्त होऊन 78 वर्षे झाली, तरी आम्ही आजही महसूल दफ्तरातील जोखडातून मुक्त झालो नाही, अशी व्यथा उपोषणकर्त्यांनी मांडली.
आम्ही भाग्यनगर, हट्टा येथील कायम रहिवासी असून शासनमान्य खरेदीखत करूनही आमचा नमुना नंबर 8 प्रशासनाने परस्पर रद्द केला. त्यामुळे गेल्या 6 वर्षांपासून आम्हाला एकाही शासकीय योजनेचा घरकुल, शौचालय, पीकविमा, शेतकरी सन्मान निधीचा लाभ मिळालेला नाही. वारंवार निवेदन देऊनही प्रशासन दुर्लक्ष करत असल्याने आजचा दिवस निवडावा लागला.
1) रद्द करण्यात आलेला नमुना नंबर 8 तात्काळ पूर्ववत करावा.
2) 6 वर्षांपासून वंचित असलेल्या पात्र नागरिकांना सर्व शासकीय योजनांचा लाभ द्यावा.
3) या प्रकरणाची सखोल चौकशी करून दोषींवर कारवाई करावी.
जोपर्यंत मागण्या मान्य होत नाहीत, तोपर्यंत उपोषण मागे घेणार नाही, असा पवित्रा उपोषणकर्त्यांनी घेतला आहे.
