Tuljabhavani Temple : तुळजाभवानी देवीचे १० दिवस फक्त मुखदर्शन, अभिषेक पूजा सुरू राहणार
तुळजापूर : श्री तुळजाभवानी देवीच्या मंदिरातील गाभाऱ्याच्या जीर्णोद्धाराचे काम हाती घेण्यात आल्याने, पुढील दहा दिवस भाविकांना देवीचे केवळ मुखदर्शन घेता येणार आहे. राज्य पुरातत्त्व विभागाच्या मार्गदर्शनाखाली हे काम २ ऑगस्ट ते १२ ऑगस्ट या कालावधीत चालणार असून, या काळात नेहमीचे धर्मदर्शन बंद राहणार आहे.
जीर्णोद्धार कामामुळे दर्शनात बदल
तहसीलदार अरविंद बोळंगे यांनी दिलेल्या माहितीनुसार, आगामी शारदीय नवरात्रोत्सवाच्या पार्श्वभूमीवर तुळजाभवानी देवीच्या गाभाऱ्यातील भिंतींवर नवीन टाईल्स बसवण्याचे काम केले जाणार आहे. हे काम सुरू असताना गाभाऱ्यात भाविकांना प्रवेश दिला जाणार नाही. त्यामुळे या दहा दिवसांच्या कालावधीत सिंह गाभाऱ्यातील धर्मदर्शन पूर्णपणे बंद राहील.
अभिषेक पूजा सुरू, मुखदर्शनाची सोय
या काळात अभिषेक पूजा मात्र नियमितपणे सुरू राहणार असून, त्यासाठी भाविकांना गाभाऱ्यात प्रवेश दिला जाईल. इतर भाविकांची गैरसोय होऊ नये यासाठी, भवानी शंकर घाटीखालून देवीच्या मुखदर्शनाची सोय करण्यात आली आहे. सुमारे ६० फूट अंतरावरून होणाऱ्या या मुखदर्शनात देवीची संपूर्ण मूर्ती आणि पादुकांचे दर्शन स्पष्टपणे होते. त्यामुळे दर्शनासाठी येणाऱ्या भाविकांना कोणतीही अडचण येणार नाही.
मंदिरातील या तात्पुरत्या बदलाची माहिती भाविक आणि पुजारी बांधवांपर्यंत पोहोचवण्यासाठी तुळजाभवानी मंदिर प्रशासनाने अधिकृत पत्रक जारी केले आहे, जेणेकरून कोणाचीही गैरसोय होणार नाही.
