धाराशिव : स्विफ्ट डिझायरमधून अवैध गुटख्याची वाहतूक होत असल्याची माहिती मिळाल्यानंतर उमरगा पोलिसांनी तलमोड चेकपोस्ट येथे नाकाबंदी करून कारवाई केली.
या कारवाईत महाराष्ट्र शासनाने प्रतिबंधित केलेला हिरा पान मसाला व रॉयल ७१७ सुगंधित तंबाखू असा २ लाख ७४ हजार ५० रुपयांचा गुटखा आणि वाहतुकीसाठी वापरलेली स्विफ्ट डिझायर असा एकूण ५ लाख ७४ हजार ५० रुपयांचा मुद्देमाल जप्त करण्यात आला.
पोलिसांनी दिलेल्या माहितीनुसार, स्विफ्ट डिझायर (एमएच १४ जीडी १३३७) मधून अवैध गुटखा वाहतूक होत असल्याची गोपनीय माहिती पोलिसांना मिळाली होती. त्यानुसार पोलिसांच्या पथकाने तलमोड चेकपोस्ट येथे सापळा रचून दुपारी साडेबारा वाजण्याच्या सुमारास संशयित वाहन अडवले.
वाहनाची तपासणी केली असता त्यामध्ये एकूण ५ लाख ७४ हजार ५० रुपयांचा मुद्देमाल जप्त केला. या प्रकरणी चालक शेख रेहान शेख रहीम (वय ३१, रा. मोमीनपुरा, बीड) आणि सय्यद अफरोज सय्यद सलीम (वय २८, रा. मोहम्मादिया कॉलनी, मोमीनपुरा, बीड) यांच्याविरुद्ध गुन्हा दाखल करण्यात आला आहे.
