Verul Police Route March
वेरुळ, पुढारी वृत्तसेवा : बकरी ईद सणाच्या पार्श्वभूमीवर खुलताबाद शहरासह वेरूळ येथे पोलिस प्रशासनाच्या वतीने रूट मार्च काढण्यात आला. सहायक पोलिस अधीक्षक (उपविभाग कन्नड) यांच्या नेतृत्वाखाली संचलन झाले.
रूट मार्चमध्ये १ पोलिस निरीक्षक, ८ पोलिस अधिकारी, ५० पोलिस अंमलदार, ५० होमगार्ड तसेच ४६ राज्य राखीव पोलिसदलाचे जवान सहभागी झाले होते. पोलिसांचा ताफा शहरातील प्रमुख मार्ग, बाजारपेठा तसेच संवेदनशील भागातून फिरला. यावेळी नागरिकांनीही रूट मार्चला सकारात्मक प्रतिसाद देत पोलिस प्रशासनाच्या तयारीचे स्वागत केले.
ध्वनिक्षेपकाच्या माध्यमातून पोलिसांनी नागरिकांना महत्त्वाच्या सूचना दिल्या. सामाजिक सलोखा अबाधित राखण्याचे आवाहन करण्यात आले. कोणत्याही प्रकारच्या अफवांवर विश्वास ठेवू नये, सोशल मीडियावर आक्षेपार्ह अथवा वादग्रस्त पोस्ट टाकू नयेत तसेच कोणतीही संशयास्पद घटना आढळल्यास त्वरित पोलिसांशी संपर्क साधावा, असेही प्रशासनाने स्पष्ट केले.
याशिवाय, बकरी ईदचा सण शांततेत आणि उत्साहात साजरा करण्यासाठी सर्व नागरिकांनी प्रशासनाला सहकार्य करावे, असे आवाहन करण्यात आले. कायदा हातात घेणाऱ्यांवर कठोर कारवाई करण्यात येईल, असा इश-ाराही पोलिस प्रशासनाकडून देण्यात आला आहे.
