Valuables worth ₹2.5 lakh stolen after house in CIDCO is broken into
छत्रपती संभाजीनगर, पुढारी वृत्तसेवा : कुटुंबीयांसह बाहेरगावी गेलेल्या तरुणाचे घर फोडून चोरट्याने रोख रक्कमेसह सोने-चांदीचे दागिने असा २ लाख ५५ हजार रुपयांचा ऐवज लंपास केला. ही घटना सिडको एन-५ भागातील गुलमोहर कॉलनीमध्ये १३ ते १५ जूनदरम्यान घडली. या प्रकरणी सिडको पोलिस ठाण्यात गुन्हा दाखल करण्यात आला आहे.
फिर्यादी आशिष सारंगधर पवार (३१, रा. एन ५, ई ४२, गुलमोहर कॉलनी, जिजामाता शाळेच्या बाजूला, सिडको) हे खाजगी नोकरी करतात. १३ जून रोजी दुपारी १२ वाजेच्या सुमारास आशिष पवार हे आपल्या कुटुंबासह लातूर येथील त्यांच्या मूळ गावी गेले होते.
दोन दिवस गावी राहिल्यानंतर १५ जून रोजी दुपारी अडीच वाजेच्या सुमारास ते कुटुंबासह घरी परतले. त्यावेळी त्यांना त्यांच्या घराचे कुलूप तुटलेले दिसले. आत जाऊन पाहिले असता, सर्व साहित्य अस्ताव्यस्त फेकलेले होते.
तसेच, बेडरूममधील कपाटाचे लॉक तोडून आत ठेवलेली १ लाख २५ हजार रुपयांची रोख रक्कम, १ तोळ्याचे सोन्याचे मंगळसूत्र, ७० भार चांदी (चांदीचे कडवाळे, ब्रेसलेट, कमरेचा छल्ला, कुहेरी, जोडवी, चैन, शिक्के, अंगठी, स्टोन) लंपास केल्याचे निदर्शनास आले. गुन्ह्याचा अधिक तपास हवालदार भानुदास खिल्लारे करत आहेत.
