The Young Maratha Cricket League received an enthusiastic response from the spectators
छत्रपती संभाजीनगर, पुढारी वृत्तसेवा : युवा मराठा प्रतिष्ठानच्या वतीने २१ ते ४५ वयोगटातील खेळाडूंसाठी आयोजित करण्यात आलेल्या युवा मराठा प्रीमियर लीग क्रिकेट स्पर्धेच्या तिसऱ्या सिजनमध्ये शनिवारी (दि. ३१) रंगतदार सामने पार पडले. मागील तीन वर्षांपासून सातत्याने आयोजित केल्या जाणाऱ्या या स्पर्धेतून उभारला जाणारा निधी समाजसेवेसाठी वापरण्यात येत असल्याने हा उपक्रम क्रीडा आणि सामाजिक बांधिलकी यांचा सुंदर संगम ठरत आहे. त्यामुळे क्रीडाप्रेमींचा उत्स्फूर्त प्रतिसाद लाभत आहे.
शनिवारच्या पहिल्या सामन्यात प्रजापिता पँथर्स आणि सिएरा स्टॅलियन्स यांच्यात लढत झाली. प्रजापिता पँथर्सने दमदार खेळ करत ४८ धावांनी विजय मिळवला. आर. के. याला सामनावीर पुरस्काराने गौरविण्यात आले. दुसऱ्या सामन्यात कुलस्वामिनी किंग्स विरुद्ध मराठा वॉरियर्स यांच्यात सामना झाला.
मराठा वॉरियर्सने सहा गडी राखून सहज विजय मिळवला. निखिल चौधरी याने प्रभावी गोलंदाजी करत तीन षटकांत चार गडी बाद केले. विशेष म्हणजे त्याने हॅटिक साधत सामनावीराचा किताब पटकावला.
तिसऱ्या आणि शेवटच्या सामन्यात नंदिनी टायटन्स आणि वीर छावा ११ यांच्यात सामना झाला. नंदिनी टायटन्सने २८ धावांनी विजय मिळवला. दक्ष काकडे ५८ धावांची खेळी करत सामनावीर ठरला. दरम्यान, या स्पर्धेत एकूण आठ संघांचा सहभाग असून सामने १ फेब्रुवारीपर्यंत सुरू राहणार आहेत.
