The election schedule for six municipal councils and one municipal panchayat in Chhatrapati Sambhajinagar district was recently announced
सुनील कच्छवे
छत्रपती संभाजीनगर जिल्ह्यातील सहा नगरपरिषद आणि १ नगरपंचायतीचा निवडणुकीची कार्यक्रम नुकताच जाहीर झाला. परंतु अद्यापही राजकीय पक्षांच्या युती, आघाडीचा निर्णय झालेला नाही. त्यामुळे स्थानिक पदाधिकारी वरिष्ठ नेत्यांकडून सूचना मिळण्याच्या प्रतीक्षेत आहेत. तूर्तास सर्वांकडूनच स्वबळ आजमावण्याच्यादृष्टीने तयारी केली जात आहे.
छत्रपती संभाजीनगर जिल्ह्यात गंगापूर, कन्नड, खुलताबाद, पैठण, सिल्लोड आणि वैजापूर या नगरपरिषदा व फुलंब्री नगरपंचायतीची निवडणूक होत आहे. मंगळवारपासून या निवडणुकीची आचारसंहिता लागू झाली. परंतु अद्यापही राज्यातील प्रमुख महाविकास आघाडी आणि महायुतीतील घटक पक्षांचे निवडणुका कशा लढवायच्या याबाबत ठरले नाही. त्यामुळे स्थानिक पदाधिकारी संभ्रमात आहेत. महायुतीतील भाजप, शिवसेना आणि राष्ट्रवादी पक्षाकडून निवडणुकीसाठी सध्या तरी स्वतंत्रपणे लढण्याची तयारी केली जात आहे. त्याचपद्धतीने महाविकास आघाडीतील शिवसेना उबाठा, काँग्रेस आणि राष्ट्रवादी काँग्रेस शरद पवार हे पक्षही स्वतंत्रपणे तयारीला लागले आहेत. वरिष्ठांकडून जसे आदेश येतील तशा पद्धतीने निवडणूक लढविण्यात येईल, असे या पक्षांकडून सांगण्यात येत आहे.
