Sunshine and unbearable heat by day, and the relief of unseasonal rain by night
छत्रपती संभाजीनगर, पुढारी वृत्तसेवा : दिवसभर पडणारा प्रखर उन्हाचा तडाखा आणि वाढलेल्या उकाड्यामुळे हैराण झालेल्या शहरवासीयांना शुक्रवारी (दि. २२) रात्री अवकाळी पावसाने काहीसा दिलासा दिला. रात्री साडेआठच्या सुमारास अचानक वातावरणात बदल झाला आणि विजांच्या कडकडाटासह ढगांच्या गडगडाटात शहर व परिसरात पावसाने दमदार हजेरी लावली.
शहरातील विविध भागांत सुमारे २५ ते ३० मिनिटे पाऊस पडला. काही ठिकाणी जोरदार, तर काही भागात मध्यम स्वरूपाच्या सरी कोसळल्या. गेल्या काही दिवसांपासून शहरात उन्हाचा चटका वाढला होता, त्यातच हवेतील आर्द्रतेमुळे उकाड्यात मोठी वाढ झाली होती.
मात्र, सायंकाळनंतर अचानक ढग दाटून आले आणि पावसाला सुरुवात झाली. शहरातील ज्युबिली पार्क, घाटी, मिल कॉर्नर, समर्थनगर, क्रांतीचौक, उस्मानपुरा, जालना रोड, सिडको, हडको आणि चिखलठाणा परिसरात पावसाचा जोर चांगला होता. तर शिवाजीनगर, पुंडलिकनगर आणि सातारा-देवळाई भागात मध्यम पाऊस झाला.
