Sambhajinagar News: 10 approved corporators in the municipality this year
छत्रपती संभाजीनगर, पुढारी वृत्तसेवा : मनपा निवडणुकीनंतर आता स्वीकृत सदस्यांकडे इच्छुकांचे लक्ष लागले आहे. यंदा शासनाच्या नव्या नियमानुसार दहा स्वीकृत सदस्य नियुक्त केले जाणार असून भाजपला ५७ जागांमुळे ६ तर एमआयएमला ३ आणि शिवसेनेच्या वाट्याला एक स्वीकृत नगरसेवक येतील, अशी शक्यता आहे.
महापालिकेत सातारा देवळाईचा समावेश झाल्यानंतर नगरसेवकांची संख्येत वाढ झाली. तेव्हापासून ११५ नगरसेवकपदासाठी निवडणूक होत आहे. यंदाही ११५ जागांसाठीच निवडणूक झाली. परंतु, यावेळी स्वीकृत नगरसेवक पदाच्या नियमात बदल करण्यात आला आहे. शासनाने २०२३ साली जो अध्यादेश जारी केला होता. त्यानुसार निवडून आलेल्या नगरसेवकांच्या संख्येच्या दहा टक्क्यांपेक्षा जास्त नसेल, असे असल्याने स्वीकृत नगरसेवकांची संख्या ११ वाढणार आहे.
परंतु, निवडणूक निकालानंतर राजकीय पक्षांचे निवडून आलेल्या नगरसेवकांच्या संख्येनुसार भाजपच्या वाट्याला किमान ६ स्वीकृत नगरसेवक येणार आहेत. तर एमआयएमकडे ३३ नगरसेवक असल्याने ३ नगरसेवकपद, शिवसेना शिंदे गटाचे १३ नगरसेवक असल्याने त्यांना १ स्वीकृत मिळेल, अशी शक्यता आहे.
नगरसेवक संख्या १२५ होणार
महापालिकेत ११५ नगरसेवक निवडून आले आहेत. त्यात आता १० स्वीकृत नगरसेवक वाढणार आहेत. त्यामुळे महापालिकेच्या नगरसेवकांची संख्या ही १२५ वर जाणार आहे. स्वीकृत नगरसेवकांना महापाच्या धोरणात्मक निर्णयात मतदान करण्याचा अधिकार नसतो. नगरसेवकांना जसे आपल्याच प्रभागात विकास काम करता येते. तसे स्वीकृत नगरसेवकांना शहरातील कोणत्याही प्रभागात काम करता येते.
