Police Experiment with AI to Identify Unclaimed Bodies
छत्रपती संभाजीनगर, पुढारी वृत्तसेवा जिल्ह्यातील दौलताबाद पोलिस ठाणे हद्दीत आसेगाव शिवारात एका अज्ञात महिलेचा मृतदेह आढळून आला आहे. या मृतदेहाची ओळख पटवणे पोलिसांसमोर मोठे आव्हान उभे ठाकले आहे. तपासासाठी पारंपरिक पद्धतीऐवजी सायबर पोलिसांनी आता आर्टिफिशियल इंटेलिजन्स (एआय) या आधुनिक तंत्रज्ञानाची मदत घेतली असून, मृत महिलेचा जिवंत भासणारा फोटो तयार केला आहे. अशा प्रकारे एआयच्या मदतीने ओळख पटवण्याचा हा जिल्ह्यातील बहुधा पहिलाच प्रयोग मानला जात आहे.
अधिक माहितीनुसार, सोलापूर-धुळे महामार्गावरील आसेगाव शिवारातील (गट क्र. ३५) पुलाखाली एका अज्ञात महिलेचा मृतदेह आढळून आला. याप्रकरणी २६ मार्च रोजी दौलताबाद पोलिस ठाण्यात अकस्मात मृत्यूची नोंद करण्यात आली आहे. बरेच प्रयत्न करूनही या महिलेची ओळख पटू शकली नाही. अनेकदा मृतदेह छिन्नविच्छिन्न अवस्थेत असल्याने किंवा चेहरा विद्रप झाल्याने मूळ फोटोवरून ओळख पटवणे कठीण जाते.
ही अडचण दूर पोलिस आयुक्त प्रवीण पवार यांनी एआयची मदत घेण्याच्या सूचना दिल्या. त्यानुसार, सायबर पोलिस ठाण्याचे निरीक्षक सोमनाथ जाधव यांच्या पथकाने या तंत्रज्ञानाद्वारे मृतदेहाच्या चेहऱ्याची ठेवण कायम ठेवून ती महिला जिवंत असताना कशी दिसत असेल, असा हुबेहूब फोटो तयार केला आहे. यामुळे नातेवाइकांना किंवा ओळखीच्या व्यक्तींना तिला ओळखणे अधिक सोपे होणार आहे.
घातपाताची शक्यता
कदाचित या महिलेचा मृत्यू घातपातही असू शकतो. सदर महिलेबाबत कोणाकडेही काही माहिती असल्यास किंवा तिचे नातेवाईक आढळल्यास त्वरित दौलताबाद पोलिस ठाणे किंवा सायबर ठाण्याशी संपर्क साधण्याचे आवाहन पोलिसांनी करण्यात आले आहे.
