पैठण:- पैठण विभागाचे डीवायएसपी सुनील पाटील यांच्या पथकाने पाटेगाव येथील गोदावरी नदीतून अवैधरित्या वाळूची तस्करी करणाऱ्या विरुद्ध सोमवार दि.१९ रोजी कारवाई केली मात्र जिल्हा गौणखनिज विभागाच्या पथकाने वाळू उत्खनन करणाऱ्या यारी मशीनच्या दोऱ्या जाळून कारवाईचा देखावा केल्याचा प्रकार घडला आहे.
अधिक माहिती अशी की पैठण शहरालगत असलेल्या पाटेगाव, नायगाव, वडवळी गोदावरी नदीतून अवैधरित्या वाळूची तस्करी करणारी टोळी खुलेआम नदीतील लाखो रुपयाच्या वाळूवर दरोडा टाकीत असल्याचा प्रकार दिवसेंदिवस वाढत चालल्याने सोमवारी रोजी पैठण विभागाचे डीवायएसपी सुनील पाटील यांच्या पथकातील पोकाॅ गणपत भवर, अरुण जाधव, भगवान धांडे, ओम डहाळे यांनी पाटेगाव येथील गोदावरी नदीत छापा मारून अवैधरित्या वाळूची तस्करी करीत असताना उत्खनन करणारी यारी मशीन ट्रॅक्टर जप्त करून पोह राजेश आटोळे यांच्या तक्रारीवरून सोमनाथ अर्जुन घेवारे रा.पाटेगाव ता.पैठण विरुद्ध गुन्हा दाखल केला असून पुढील तपास पोलीस निरीक्षक महादेव गोमारे यांच्या मार्गदर्शनाखाली पोह रावसाहेब आव्हाड हे करीत आहे.
दरम्यान रविवारी रोजी रात्री जिल्हा अधिकारी कार्यालयातील गौणखनिज विभागाचे प्रमुख दिनेश झापले यांच्यासह पथक पैठण येथे कारवाईसाठी आले होते. परंतु सदरील पथकाने वाळू उत्खनन करणाऱ्या यारी मशीनच्या दोऱ्या जाळून कारवाईचा देखावा तयार करून गेल्याचा प्रकार घडला आहे.
