छत्रपती संभाजीनगर : युद्धजन्य परिस्थितीमुळे जिल्ह्यात गॅस सिलिंडरच्या तुटवड्याची स्थिती निर्माण झाली आहे. त्यामुळे जिल्ह्यात पुरवठा विभागाकडून हॉटेलांची तपासणी मोहीम हाती घेण्यात आली आहे. या मोहिमेत सोमवारी कन्नड, गंगापूर आणि सिल्लोड तालुक्यात २३ हॉटेलांमधून घरगुती वापराचे ३८ गॅस सिलिंडर जप्त करण्यात आली.
संबंधितांविरोधात पोलिसांत तक्रार देण्यात आली आहे. गॅस सिलिंडरचा काळाबाजार, साठेबाजी आणि गैरवापर थांबविण्यासाठी जिल्हा प्रशासनाकडून विविध उपाययोजना राबविण्यात येत आहेत. याअंतर्गत जिल्हा पुरवठा अधिकारी प्रवीण फुलारी यांच्या आदेशानुसार आधी गॅस एजन्सींच्या गोदामांची तपासणी करण्यात आली. त्यानंतर आता हॉटेलांमधील गॅस सिलिंडरही तपासण्यात येत आहे.
कुठे किती सिलिंडर जप्त
कन्नड -२० सिलिंडर
गंगापूर -१४ सिलिंडर
सिल्लोड -४ सिलिंडर
