Goat killed in leopard attack
कन्नड, पुढारी वृत्तसेवा : तालुक्यातील चिकलठाण परिसरात बिबट्याने केलेल्या हल्ल्यात एक बोकड व एक बकरी ठार झाली असून, कुत्रा गंभीर जखमी झाला. ग्रामस्थांमध्ये भीतीचे वातावरण निर्माण झाले आहे. चिकलठाण येथील शेतकरी उत्तम साहेबराव चव्हाण यांच्या गट क्रमांक ३५२ मधील शेतात मंगळवारी मध्यरात्री सुमारे साडेबारा वाजण्याच्या सुमारास बिबट्याने हल्ला चढवला.
या हल्ल्यात एक बोकड व एक बकरी ठार झाली असून घराजवळील कुत्रा गंभीर जखमी झाला आहे. अचानक झालेल्या या प्रकारामुळे परिसरातील शेतकरी व नागरिकांमध्ये घबराट पसरली आहे.
घटनेची माहिती मिळताच वन विभागाच्या पथकाने तत्काळ घटनास्थळी धाव घेतली. वनपरिमंडळ अधिकारी ए. जी. वाघ, वनरक्षक एस. बी. वाघ तसेच पशुवैद्यकीय अधिकारी बनकर यांनी घटनास्थळी भेट देऊन पाहणी केली व पंचनामा केला.
या वेळी उबाठा विभागप्रमुख कल्याण चव्हाण, दीपक चव्हाण, ज्ञानेश्वर चव्हाण, अनिल दळे, प्रवीण क्षीरसागर, बाबासाहेब चव्हाण, भागिनाथ मगर, योगेश्वर चव्हाण, संतोष चव्हाण आदी ग्रामस्थ उपस्थित होते. दरम्यान, चिकलठाण परिसरात बिबट्याचा वावर वाढल्याने ग्रामस्थांमध्ये भीतीचे वातावरणआहे. वन विभागाने तातडीने उपाययोजना करून बिबट्याचा बंदोबस्त करावा, अशी मागणी ग्रामस्थांकडून करण्यात येत आहे.
