Female police officer beaten in police station video goes viral
छत्रपती संभाजीनगर : छत्रपती संभाजीनगरमधील बिडकीन पोलीस ठाण्यात एक धक्कादायक घटना घडली आहे. ड्युटीवर असलेल्या महिला पोलीस कर्मचारी समीना अहमद शेख यांना संशयित आरोपीसोबत आलेल्या एका महिलेने पोलीस ठाण्यातच मारहाण केल्याचा प्रकार समोर आला आहे. या प्रकरणी रजिया रियाज शेख या महिलेवर बिडकीन पोलीस ठाण्यात गुन्हा दाखल करण्यात आला आहे. या घटनेचा व्हिडिओ सोशल मीडियावर व्हायरल झाला असून, यामुळे परिसरात खळबळ उडाली आहे.
बिडकीन पोलीस ठाण्यात महिला पोलीस कर्मचारी समीना अहमद शेख या ड्युटीवर होत्या. यावेळी संशयित आरोपीसोबत पोलीस ठाण्यात आलेली रजिया रियाज शेख ही महिला पीएसओ रूममध्ये आली. तिने समीना यांना उद्देशून ‘तू मला काय बोललीस?’ असे म्हणत अरेरावी आणि शिवीगाळ सुरू केली. यानंतर तिने समीना यांचे कपडे ओढले आणि गालावर चापट मारली. इतक्यावरच न थांबता रजियाने समीना यांना ठार मारण्याची धमकी दिली. ही संपूर्ण घटना पोलीस ठाण्यात उपस्थित असलेल्या एका व्यक्तीने आपल्या मोबाइलमध्ये रेकॉर्ड केली. हा व्हिडिओ आता सोशल मीडियावर व्हायरल होत आहे, ज्यामुळे पोलिसांवरील हल्ल्याचा हा प्रकार चर्चेचा विषय ठरला आहे.
या घटनेनंतर बिडकीन पोलीस ठाण्यात रजिया रियाज शेख यांच्याविरुद्ध गुन्हा दाखल करण्यात आला आहे. तिच्यावर सरकारी कामात अडथळा आणणे, मारहाण करणे आणि धमकी देणे यासारख्या कलमांखाली गुन्हा नोंदवण्यात आला आहे. पोलीस या प्रकरणाचा सखोल तपास करत असून, व्हायरल व्हिडिओच्या आधारे पुरावे गोळा करण्याचे काम सुरू आहे. या घटनेमुळे पोलीस ठाण्यातील सुरक्षेचा प्रश्न पुन्हा एकदा ऐरणीवर आला आहे.
पोलीस ठाण्यात ड्युटीवर असलेल्या महिला कर्मचाऱ्यावर झालेला हा हल्ला हा गंभीर प्रकार मानला जात आहे. पोलीस ठाणे हे कायदा आणि सुव्यवस्थेचे प्रतीक मानले जाते, अशा ठिकाणी अशा प्रकारच्या घटना घडणे हे चिंताजनक आहे. यामुळे पोलीस कर्मचाऱ्यांच्या सुरक्षेसाठी विशेष उपाययोजना करण्याची गरज अधोरेखित झाली आहे. विशेषतः महिला पोलीस कर्मचाऱ्यांना अशा परिस्थितीत संरक्षण देण्यासाठी प्रशासनाकडून कोणती पावले उचलली जाणार, याकडे सर्वांचे लक्ष लागले आहे.
