वैजापूर : वैजापूरच्या राजकारणातील मोठी घडामोड समोर येत आहे. वैजापूर-गंगापूर मतदारसंघाचे माजी आमदार भाऊसाहेब चिकटगावकर हे उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करणार असल्याची एक्सक्लुझिव्ह माहिती पुढारीला मिळाली आहे. उपमुख्यमंत्री एकनाथ शिंदे यांच्या प्रमुख उपस्थितीत मंगळवारी (18 रोजी) मुंबईत हा पक्षप्रवेश पार पडणार आहे.
शिवसेनेत फूट पडल्यावर चिकटगावकरांनी राष्ट्रवादी काँग्रेसला सोडचिठ्ठी देत उद्धव ठाकरेंच्या शिवसेनेत प्रवेश केला होता. त्यांच्या प्रवेशामुळे वैजापूरमध्ये ठाकरे गटाला बळकटी मिळाली होती. मात्र, विधानसभा निवडणुकीत शिवसेनेने चिकटगावकरांना उमेदवारी न देता भाजपचे डॉ. दिनेश परदेशी यांना पक्षात घेत उमेदवारी दिली. या निर्णयामुळे नाराज झालेल्या चिकटगावकरांनी निवडणूक न लढता शिंदे गटाचे आमदार रमेश बोरनारे यांना पाठिंबा जाहीर केला होता.
त्यावेळी चिकटगावकरांनी स्वतः शिंदे गटात प्रवेश करणार नसल्याचे स्पष्ट केले होते. मात्र, पुढील राजकीय वाटचाल कशी असेल, कार्यकर्त्यांचे भवितव्य काय, याबाबत चर्चेला उधाण आले होते. आता मात्र त्यांनी शिंदे गटात जाण्याचा निर्णय घेतला आहे. त्यांच्या निकटवर्तीयांनी दिलेल्या माहितीनुसार, मंगळवारी दुपारी उपमुख्यमंत्री एकनाथ शिंदे यांच्या उपस्थितीत चिकटगावकरांचा पक्षप्रवेश होणार आहे.
