Action taken against an auto-rickshaw driver transporting schoolchildren while under the influence of alcohol
छत्रपती संभाजीनगर, पुढारी वृत्तसेवा : दारूच्या नशेत तर्रर्र होऊन शाळकरी मुलांची ने-आण करणाऱ्या एका मद्यधुंद रिक्षाचालकाचा व्हिडिओ बुधवारी (दि. १५) सोशल मीडियावर व्हायरल झाल्यानंतर शहर वाहतूक पोलिसांनी तातडीने धडक कारवाई केली आहे. या बेजबाबदार रिक्षाचालकाला शोधून काढत पोलिसांनी त्याची रिक्षा जप्त केली असून, त्याच्यावर 'ड्रंक अँड ड्राईव्ह' अंतर्गत कारवाईचा बडगा उगारला आहे. प्रदीप अशोक दाभाडे, असे मद्यपी रिक्षाचालकाचे नाव असल्याची माहिती पोलिस निरीक्षक मंगेश जगताप यांनी दिली.
शहरात एक धक्कादायक व्हिडिओ सोशल मीडियावर व्हायरल झाला. यात एक रिक्षाचालक दारूच्या नशेत शाळकरी मुलांना शाळेतून घरी घेऊन जात असल्याचे स्पष्ट दिसत होते. शहागंज भागातील एका सुजाण नागरिकाने हा व्हिडिओ मोबाईलमध्ये कैद केला.
रिक्षाचालकाला जाब विचारण्यात आला असता त्याने तुला काय करायचे ते कर, असे म्हणत शाळकरी चिमुकल्यांना घेऊन तेथून निघून गेला होता. या गंभीर प्रकारामुळे विद्यार्थ्यांच्या सुरक्षेचा प्रश्न निर्माण झाला होता. या व्हिडिओची दखल घेत पोलिस आयुक्त प्रवीण पवार यांनी तातडीने कारवाईचे आदेश दिले.
त्यानुसार शहर वाहतूक शाखा-२ चे पोलिस निरीक्षक मंगेश जगताप, उपनिरीक्षक विलास बोडले, अंमलदार मडावी, नरोटे, ठोंबरे आणि अवकाळे यांच्या पथकाने या रिक्षाचालकाचा शोध सुरू केला. अवघ्या काही तासांतच पोलिसांनी रिक्षा चालक (एमएच २० ईके ९२१२) या क्रमांकाच्या रिक्षासह चालक प्रदीप अशोक दाभाडे याला ताब्यात घेतले. पोलिसांनी प्रदीप दाभाडे याची 'ब्रेथ अनालायझर' यंत्राद्वारे तपासणी केली असता, त्याने दारू प्यायल्याचे निष्पन्न झाले. शाळकरी मुलांच्या जीवाशी खेळणाऱ्या या चालकावर मोटार वाहन कायद्यानुसार (ड्रंक अँड ड्राईव्ह) कारवाई करण्यात आली आहे. त्याची रिक्षा जप्त करून छावणी मैदानात जमा करण्यात आली आहे.
