A motorcyclist was killed in a collision with a speeding truck.
वैजापूर, पुढारी वृत्तसेवा :
तालुक्यातील नांदूरढोक गावाजवळ भरधाव हायवाने तरुणाला जोरदार धडक दिल्याची धक्कादायक घटना घडली. या अपघातात जालिंदर एकनाथ गायधने (३९) यांचा जागीच मृत्यू झाला. घटनेनंतर संतप्त झालेल्या ग्रामस्थांनी हायवा पेटवून दिला. त्यामुळे परिसरात तणावाचे वातावरण निर्माण झाले.
मातीने भरलेला हायवा बाबुळगावगंगाहून नांदूर ढोक दिशेने अतिवेगाने जात होता. याचवेळी दुचाकीस्वार जालिंदर गायधने यास हायवाने धडक दिली. धडक इतकी भीषण होती की, त्यांचा जागीच मृत्यू झाला. अपघाताची माहिती पसरताच नांदूर ढोकसह परिसरातील नागरिक मोठ्या संख्येने घटनास्थळी जमले.
वारंवार होणाऱ्या अपघातांमुळे संतप्त झालेल्या ग्रामस्थांचा उद्रेक झाला आणि त्यांनी हायवाला आग लावली. घटनेची माहिती मिळताच वीरगाव पोलिस घटनास्थळी दाखल झाले. पोलिसांनी परिस्थिती नियंत्रणात आणली असून, अतिरिक्त पोलिस बंदोबस्त तैनात करण्यात आला आहे. आगीमुळे काही काळ वाहतूक विस्कळीत झाली होती.
या प्रकरणी पोलिसांकडून पंचनामा करून गुन्हा दाखल करण्याची प्रक्रिया सुरू आहे. प्रशासनाकडून नागरिकांना शांतता राखण्याचे आवाहन करण्यात आले आहे.
नेहमीच्या त्रासामुळे नागरिक त्रस्त
परिसरात अवजड वाहनांची दहशत रोजचीच झाली आहे. वेगमर्यादा कागदावर, नियंत्रणशून्य आणि प्रशासन मुकदर्शक अपघात होतो, बळी जातो आणि मग चौकशीचा फार्स सुरू होतो. वेळेवर कारवाई झाली असती तर आज जालिंदर गायधने यांचा जीव गेला नसता, असे नागरिकांचे म्हणणे आहे.
