The District Collector held a 'Janata Darbar' in Majalgaon
माजलगाव, पुढारी वृत्तसेवा : बीडचे जिल्हाधिकारी विवेक जॉन्सन यांनी माजलगाव येथील उपविभागीय अधिकारी कार्यालयात आयोजित जनता दरबारात शेकडो नागरिकांच्या तक्रारी ऐकून घेतल्या. महसूल, पाणीपुरवठा, शेती, रस्ते व विविध शासकीय योजनांशी संबंधित समस्या मोठ्या प्रमाणावर मांडण्यात आल्या.
यावेळी अप्पर जिल्हाधिकारी अश्विनी सोनवणे, उपविभागीय अधिकारी गौरव इंगोले, तहसीलदार संतोष रुईकर, गटविकास अधिकारी ज्योत्स्ना मुळीक तसेच पोलीस विभागाचे अधिकारी उपस्थित होते.
नागरिकांच्या समस्या सोडविण्यास प्रशासन कटिबद्ध असल्याचे जिल्हाधिकाऱ्यांनी स्पष्ट केले. जनता दरबारादरम्यान शेतकरी युवा संघर्ष समितीच्या कार्यकर्त्यांनी थकीत ऊस बिलाच्या प्रश्नावरून जिल्हाधिकाऱ्यांच्या गाडीसमोर आंदोलन केले. तालुक्यातील साखर कारखान्यांनी उसाचे बिल न दिल्याने संतप्त झालेल्या कार्यकर्त्यांनी घोषणाबाजी करत निषेध व्यक्त केला.
