बीड : पुढारी वृत्तसेवा
संतोष देशमुख हत्या प्रकरणातील संशयित आरोपी सुदर्शन घुले याचा मोबाईल तपासण्यासाठी एस आय टी कडून आज (सोमवार) पोलीस कस्टडी मागणी करण्यात आली. न्यायालयाने त्याला 31 जानेवारीपर्यंत पोलीस कोठडी ठेवण्याचे आदेश दिले.
तपास अधिकारी अपर पोलीस अधीक्षक किरण पाटील यांनी संतोष देशमुख हत्याकांडातील प्रमुख संशयित आरोपी सुदर्शन घुले याचा मोबाईल मधील डाटा तपासामध्ये हस्तगत करण्यात आला आहे. याच डाटा संदर्भात चौकशी करण्यासाठी सुदर्शन घुले याची पोलीस कस्टडी हवी आहे. यासोबतच एक दुसरा मोबाईल जो सुदर्शन घुले याचा पोलिसांच्या ताब्यात आहे. त्या मोबाईलचे लॉक अद्याप उघडलेले नाही आणि तेही उघडायचे आहे. त्याचा तपास करायचा आहे असे म्हंटले आहे.
तर संशयित आरोपीचे वकील अनंत तिडके यांनी यापूर्वीच तपास करत असताना जो डिजिटल इव्हिडन्स पोलिसांच्या हाती लागला आणि त्यातून असं सांगण्यात आलं की, संशयित आरोपीच्या चेहऱ्यावर कोणतीही भीती अथवा पश्चाताप पाहायला मिळाला नाही. जर ही माहिती 14 दिवसांपूर्वीच पोलिसांकडे होती तर मग आता कोणता मोबाईल त्यांना ओपन करायचा आहे असा प्रति प्रश्न संशयित आरोपीचे वकील अनंत तिडके यांनी विचारला.
यासोबतच ज्या दिवशी संतोष देशमुख यांची हत्या झाली त्याच्या काही तासानंतरच पोलिसांनी जे वाहन ताब्यात घेतलं त्यातच मोबाईल आढळून आले होते. मग इतक्या दिवस हे मोबाईल जर पोलिसांच्या ताब्यात आहेत तर तो तपास आतापर्यंत का झाला नाही असा प्रश्न सुद्धा यावेळी संशयित आरोपीच्या वकिलाने विचारला. दोन्ही बाजूचा युक्तिवाद ऐकत संशयित आरोपी सुदर्शन घुले याला 31 जानेवारीपर्यंत एसआयटी कोठडी देण्यात आली आहे.
