आष्टी : अवैधरीत्या गांजाचा साठा करून त्याची विक्री करणाऱ्या टोळीविरोधात दहशतवाद विरोधी शाखा व आष्टी पोलिसांनी संयुक्त कारवाई करत तब्बल 1 लाख 6 हजार रुपयांचा मुद्देमाल जप्त केला. या प्रकरणी दोन आरोपींविरुद्ध एनडीपीएस कायद्यान्वये गुन्हा दाखल करण्यात आला आहे.
पोलिसांना मिळालेल्या गुप्त माहितीनुसार परतूर तालुक्यातील आष्टी येथील इमलिया मोहल्ल्यात एका घरात गांजाचा साठा करून त्याची चोरी छुपे विक्री केली जात असल्याची माहिती मिळाली. त्यानुसार पोलिसांनी छापा टाकून कारवाई केली.
या कारवाईत 56 हजारांचा 2 किलो 240 ग्रॅम गांजा तसेच 50 हजार रुपये किमतीचा सॅमसंग कंपनीचा एस-23 अल्ट्रा मोबाईल असा 1 लाख 6 हजार रुपयांचा मुद्देमाल जप्त करण्यात आला.या प्रकरणी सोहेल खान युसुफ खान पठाण (रा. इस्लामिया मोहल्ला, आष्टी, ता. परतूर) व सिद्धार्थ ज्ञानेश्वर जाधव (रा. आष्टी) यांच्याविरुद्ध गुन्हा दाखल केला आहे.
तपास सुरू
ही कारवाई पोलिस अधीक्षक जालना यांच्या मार्गदर्शनाखाली दहशतवाद विरोधी शाखा व आष्टी पोलिसांच्या पथकाने संयुक्तपणे पार पाडली. आरोपींकडून गांजा कोठून आणला जात होता व त्याची विक्री कुठे केली जात होती याचा पुढील तपास सुरू आहे.
