नेकनूर : चार दिवसापूर्वी येळबघाट परिसरात झालेल्या अपघातात दोन तरुणांचा जागीच मृत्यू झाला होता. बुधवारी रात्री पुन्हा याच मार्गावर नेकनूरजवळ अपघात घडून दुचाकीस्वार युवक जागीच ठार झाला. ट्रॅक्टर ट्रॉलीला रिफ्लेक्टर नसल्याने अपघात घडल्याचे बोलले जात आहे.
या अपघातात अजय गायकवाड (वय 24) चा मृत्यू झाला. तो पुण्यातून कामावरून सुट्टी घेऊन दिवाळीसाठी २ दिवसापूर्वी नांदूरफाटा येथे गावी आला होता. नेकनूरकडून गावी नांदूरफाटाकडे जात असताना अजय गायकवाडला ट्रॅक्टरला धडकून आपला जीव गमवावा लागला. अपघातानंतर ट्रॅक्टर चालक न थांबता निघून गेला.
अपघाताच्या ठिकाणी मांजरसुंबा येथील महामार्ग पोलीस मदतीसाठी वेळेवर पोहोचावेत, शिवाय अपघात रोखण्यासाठी ठोस उपाययोजना केल्या जाव्यात, अशी मागमी होत आहे. अहिल्यानगर- अहमदपूर मार्गावर असणाऱ्या मांजरसुंबा-केज रस्त्यावर अपघाताचे वाढते प्रमाण चिंता वाढवणारे आहे.
चार दिवसापूर्वी येळबघाट जवळ बसला धडकून दोन युवकांचा मृत्यू झाला होता. त्यानंतर बुधवारी अजयचा देखील अपघात झाला. तरी महामार्ग पोलिसांनी आणि प्रशासनाने याकडे गांभीर्याने लक्ष देण्याची मागणी होत आहे.
