केज : पेरणीसाठी आर्थिक अडचणींचा सामना करत असलेल्या एका २६ वर्षीय तरुण शेतकऱ्याने नैराश्यातून गळफास घेऊन जीवन संपवल्याची घटना केज तालुक्यातील कोरडेवाडी येथे घडली.
कोरडेवाडी येथील बाबू सुभाष यादव (वय २६) यांच्या नावावर सुमारे २ हेक्टर २० आर शेती आहे. गेल्या आठवड्यापासून पावसाला सुरुवात झाल्याने परिसरातील शेतकऱ्यांनी पेरणीची कामे सुरू केली होती. बाबू यादव यांनी उपलब्ध असलेल्या पैशांतून काही क्षेत्राची पेरणी केली. मात्र संपूर्ण शेतीची पेरणी करण्यासाठी आवश्यक निधी उपलब्ध नसल्याने ते चिंतेत होते. वेळेत पेरणी झाली नाही तर शेती पडीक राहील, या विचारातून ते मानसिक तणावात असल्याचे सांगितले जात आहे.
या नैराश्यातून त्यांनी १ जुलै रोजी सकाळी सुमारे १०.३० वाजता शेतातील लिंबाच्या झाडाला दोरीच्या साहाय्याने गळफास घेऊन जीवन संपवले. घटनेची माहिती मिळताच जमादार पुरुषोत्तम शेप व पोलीस नाईक गोरख फड यांनी घटनास्थळी भेट देऊन पंचनामा केला. त्यानंतर मृतदेह उत्तरीय तपासणीसाठी पाठविण्यात आला.
वृत्त लिहिपर्यंत या घटनेची केज पोलीस ठाण्यात नोंद झालेली नव्हती. बाबू यादव यांच्या पश्चात आई, पत्नी आणि एक लहान मुलगी असा परिवार आहे. आत्महत्येच्या कारणांबाबत निश्चित निष्कर्ष संबंधित तपास पूर्ण झाल्यानंतरच स्पष्ट होऊ शकतील. त्यामुळे बातमीत उपलब्ध माहितीनुसारच उल्लेख करण्यात आला आहे.
