दिंद्रुड : दिवाळीच्या सुटीनिमित्त गावी गेलेल्या एका सहशिक्षिकेच्या बंद घराचे कुलूप कटरने कापून चोरट्यांनी चोरी केल्याची घटना रविवारी सायंकाळी उघडकीस आली. या चोरीत 65 हजार रुपये रोख रकमेसह सोन्या-चांदीचे दागिने चोरट्यांनी लंपास केले.
दिंद्रुड येथील चाटगाव रस्त्यावर सहशिक्षक वशिष्ठ चव्हाण यांच्या घरात जालना जिल्ह्यातील परतूर येथील नम्रता अनिल खंदारे या सहशिक्षिका भाड्याने राहतात. दिवाळीच्या सुटीनिमित्त त्या गावी गेल्या होत्या. सोमवारी शाळा सुरू होणार असल्याने रविवारी सायंकाळी त्या दिंद्रुड येथे परतल्या. यावेळी घराच्या दरवाजाची कडी-कोंडी कटरने कापलेल्या अवस्थेत आढळली.
घरात प्रवेश केल्यानंतर सामानाची नासधूस व वस्तूंची फेकाफेक झाल्याचे त्यांच्या निदर्शनास आले. घराची पाहणी केली असता 65 हजार रुपये रोख आणि सोन्या-चांदीचे दागिने चोरीला गेल्याचे लक्षात आले