केज: केज तालुक्यातील जिवाचीवाडी येथे मुलाने केलेल्या कामाचे पैसे मागितल्याच्या कारणावरून एका मजुरास जातीवाचक शिवीगाळ करून मारहाण करण्यात आल्याची धक्कादायक घटना घडली. या प्रकरणी संबंधित पती-पत्नीविरुद्ध केज पोलिस ठाण्यात ॲट्रॉसिटीचा गुन्हा दाखल करण्यात आला आहे.
धनराज बाबुराव वाघमारे (वय ५४, रा. जिवाचीवाडी, ता. केज) हे २५ फेब्रुवारी रोजी सायंकाळी सुमारे ५ वाजता गावातील किराणा दुकानासमोर आपल्या मुलाने केलेल्या कामाचे पैसे मागण्यासाठी माऊली दिनकर चौरे यांच्याकडे गेले होते. यावेळी “तुझे कसले पैसे? माझ्याकडे पैसे नाहीत,” असे म्हणत माऊली चौरे व त्यांची पत्नी शीतल चौरे यांनी धनराज वाघमारे यांना जातीवाचक शिवीगाळ केली.
त्यानंतर दोघांनी मिळून वाघमारे यांना लाथाबुक्क्यांनी व चापटांनी मारहाण केली. तसेच दगड व वीट डोक्यात मारून त्यांना गंभीर जखमी केले. या हल्ल्यात वाघमारे यांचे डोके फुटले असून त्यांच्यावर उपचार करण्यात आले.
या प्रकरणी धनराज वाघमारे यांनी दिलेल्या फिर्यादीवरून माऊली चौरे व शीतल चौरे यांच्याविरुद्ध केज पोलिस ठाण्यात गुन्हा दाखल करण्यात आला आहे. या घटनेचा तपास प्रभारी सहाय्यक पोलिस अधीक्षक ऋषिकेश शिंदे करीत आहेत.
